پنجاب پولیس کی کارروائیاں،10 گینگز کے 24 کارندے گرفتار، ، اسلحہ و دیگر سامان برآمد

ہفتہ 17 مئی 2025 21:30

لاہور (اُردو پوائنٹ اخبارتازہ ترین - اے پی پی۔ 17 مئی2025ء) انسپکٹر جنرل پولیس ڈاکٹر عثمان انور کی ہدایت پر پنجاب پولیس کی گینگز کے خلاف کارروائیاں جاری ہیں، پنجاب پولیس نے 24 گھنٹوں میں 10 گینگز کے 24 کارندے گرفتار کر لیے،ملزمان کے قبضے سے کلاشنکوف، پسٹلز، رائفلز، ریوالورز، بندوقوں سمیت 122 ہتھیار اورسینکڑوں کی تعداد میں گولیاں برآمد کیں۔

(جاری ہے)

ترجمان پنجاب پولیس نے بتایا کہ30 موٹر سائیکلز، 15 موبائل فونز، 05 مویشی اور 20 لاکھ روپے نقدی برآمد کی گئی جبکہ 321 اشتہاری، 149 عدالتی مفرور اور 68 عادی مجرم بھی گرفتار کیے گئے۔اسی طرح جرائم پیشہ عناصر کے خلاف کارروائیوں میں 04 مجرمان کیفر کردار کو پہنچے، 04 زخمی اور 03 کو گرفتار کیا گیا۔ آئی جی پنجاب نے افسران کو ہدایت دیتے ہوئے کہا کہ جرائم پیشہ افراد کے خلاف آپریشنز جاری رکھے جائیں۔