غزہ پر تازہ اسرائیلی حملوں میں 17 فلسطینی شہید، قاقبض فوج نے انڈونیشیائی ہسپتال مسمار کرنا شروع کردیا

پیر 19 مئی 2025 11:00

غزہ (اُردو پوائنٹ اخبارتازہ ترین - اے پی پی۔ 19 مئی2025ء) پیر کو غزہ پر اسرائیلی حملوں کے نتیجے میں کم از کم 17 فلسطینی شہید ہو گئے۔الجزیرہ ٹی وی کے مطابق اسرائیلی فوج نے جنوبی غزہ میں خان یونس اور اس کے اطراف پر زبردست فضائی حملہ کیا جس کے نتیجے میں 6 افرادشہید اور درجنوں زخمی ہوگئے،حملے میں خان یونس میں واقع ناصر میڈیکل کمپلیکس کو بھی نشانہ بنایا گیا۔

اسرائیلی وزیر اعظم کے مشیر دیمتری گینڈلمین کے مطابق اسرائیل کی افواج غزہ میں آپریشن "گیڈونز چیریٹس"کے فیصلہ کن مرحلے میں داخل ہو گئی ہیں اور شہر کے اندرپیش قدمی کر رہی ہیں ۔ مشیر نے بتایا کہ گزشتہ ہفتے کے دوران اسرائیلی فضائیہ نے اس علاقے میں سینکڑوں اہداف کو نشانہ بناتے ہوئے عسکریت پسندوں کے ٹھکانوں کو بھی تباہ کیا۔

(جاری ہے)

الجزیرہ کے مطابق 18 مئی کو غزہ پر اسرائیلی مسلح افواج کے حملوں میں کم از کم 151 افراد شہید ہوئے جن میں 70 غزہ شہر اور اس کے شمال میں گولہ باری سے شہید ہوئے۔

اسرائیلی فوج کے تین ڈویژن اس وقت غزہ میں زمینی کارروائیوں میں حصہ لے رہے ہیں۔الجزیرہ کے مطابق قابض فوجیوں نے شمالی غزہ میں انڈونیشیائی ہسپتال کو مسمار کرنا شروع کر دیا ہےجس کی عمارت میں اب بھی میں کم از کم 55 افراد موجود ہیں۔رپورٹ کے مطابق اسرائیل فوج نے بھاری فوجی سازوسامان اور بلڈوزر کا استعمال کرتے ہوئے ہسپتال کے گیٹ کو گرا یا اور عمارت کی شمالی دیوار کو مکمل طور پر تباہ کر دیا،عمارت میں 12 ڈاکٹر اور 43 مریض پھنسے ہوئے ہیں، علاقے میں فائرنگ اور گولہ باری کی بھی اطلاعات ہیں جبکہ ہسپتال کے انتہائی نگہداشت کے یونٹ ( آئی سی یو) کو بھی نشانہ بنایا جارہا ہے۔

غزہ کی وزارت صحت کے مطابق انڈونیشیا کا یہ ہسپتال شمالی غزہ میں کام کرنے والا آخری طبی مرکز تھا جس نے جبالیہ، بیت لاہیا اور بیت حنون میں رہنے والے تقریباً چار لاکھ لوگوں کو طبی خدمات فراہم کیں۔\932