ریلوے ملتان ڈویژن کا قبضہ مافیا کے خلاف کامیاب آپریشن، 2 کروڑ 15 لاکھ روپے مالیت کی زمین واگزار

پیر 19 مئی 2025 17:31

اسلام آباد (اُردو پوائنٹ اخبارتازہ ترین - اے پی پی۔ 19 مئی2025ء) وفاقی وزیر ریلوے محمد حنیف عباسی کی ہدایات پر عمل درآمد کرتے ہوئے ملک بھر میں موجودریلوے اراضی کو قبضہ مافیا سے واگزار کرانے کے لئے آپریشن کیا جا رہا ہے۔اس ضمن میں ریلوے ملتان ڈویژن نے قبضہ مافیا کے خلاف کامیاب آپریشن کرکے 2 کروڑ 15 لاکھ روپے مالیت کی زمین واگزار کرائی ہے۔وفاقی وزیر برائے ریلوے محمد حنیف عباسی کی ہدایات پر ریلوے ملتان ڈویژن نے ناجائز قبضہ مافیا کے خلاف بھرپور کریک ڈائون کرتے ہوئے فورٹ عباس ریلوے سٹیشن (فورٹ عباس -بہاول نگر بند سیکشن) کے قریب 2 کروڑ 15 لاکھ روپے مالیت کی ریلوے زمین واگزار کروائی ہے۔

ڈی ایس ریلوے ملتان ذوالفقار علی شیخ کی سربراہی میں یہ اینٹی انکروچمنٹ آپریشن کامیابی سے مکمل کیا گیا جس میں ریلوے پولیس، ریلوے ملازمین اور متعلقہ اہلکاروں نے بھرپور حصہ لیا۔

(جاری ہے)

آپریشن کے دوران 4 عدد کمرشل پلاٹ جن پر ٹف ٹائل اور پکی سولنگ نصب تھی، انہیں ہٹایا گیا اور 4 کنال کمرشل اراضی واگزار کروائی گئی۔ اس کے علاوہ چھپر، تھڑے اور پکا اینٹوں کا بھٹہ سمیت کل ساڑھے پانچ کنال کمرشل زمین بھی قبضہ مافیا سے واپس حاصل کی گئی۔

ڈی ایس ریلوے ملتان ذوالفقار علی شیخ نے کہا کہ ملتان ڈویژن میں قبضہ مافیا کے خلاف جاری زیرو ٹالرنس پالیسی کے تحت ہر ایک انچ ریلوے زمین کو واگزار کرانے کے لیے بھرپور کارروائیاں کی جائیں گی تاکہ ریلوے کی پراپرٹی کو محفوظ بنایا جا سکے۔یہ کامیاب آپریشن وفاقی وزیر ریلوے کی سخت ہدایات اور ملک بھر میں قبضہ مافیا کے خاتمے کے عزم کی عکاسی کرتا ہے۔