آئی ایم ایف کا مکمل قرض واپس کر کے نائیجیریا نے دنیا کو حیران کر دیا

پیر 19 مئی 2025 20:11

ابوجا(اُردو پوائنٹ اخبارتازہ ترین - آن لائن۔ 19 مئی2025ء) نائیجیریا نے عالمی مالیاتی فنڈ (آئی ایم ایف) سے لیے گئے 3 ارب 40 کروڑ ڈالر کے قرض کی مکمل ادائیگی کر کے خود کو قرض سے آزاد ملک قرار دے دیا۔ یہ رقم نائیجیریا نے کووِڈ 19 کی وبا کے دوران 2020 میں ہنگامی بنیادوں پر حاصل کی تھی۔وائس آف افریقہ کی رپورٹ کے مطابق نائیجیریا نے یہ ادائیگی 30 اپریل 2025 کو طے شدہ مدت سے پہلے مکمل کی، جسے مبصرین نے نائیجیریا کے بہتر مالیاتی نظم و ضبط اور معاشی خودمختاری کی علامت قرار دیا ہے۔

یہ قرض ری پیڈ فنانسنگ انسٹرومنٹ (RFI) کے تحت فراہم کیا گیا تھا، جو مالی دباؤ کے شکار ممالک کے لیے فوری امداد کا ذریعہ ہوتا ہے۔ نائیجیریا نے اس رقم کو صحت، معاشی استحکام اور کمزور طبقے کے تحفظ کے لیے استعمال کیا، اور وبا کے بدترین دنوں میں اس قرض نے معیشت کو سہارا دیا۔

(جاری ہے)

آئی ایم ایف کے نمائندے کے مطابق اگرچہ نائیجیریا کو ایس ڈی آر چارجز کے تحت 2029 تک معمولی ادائیگیاں کرنا ہوں گی، لیکن اصل قرض مکمل ادا کیا جا چکا ہے۔ اس پیش رفت کے بعد نائیجیریا کا نام آئی ایم ایف کے قرض دار ممالک کی فہرست سے خارج کر دیا گیا ہے۔یہ کامیابی نائیجیریا کو مستقبل میں عالمی مالیاتی اداروں اور غیر ملکی سرمایہ کاروں کے ساتھ بہتر شرائط پر مذاکرات کا موقع فراہم کرے گی۔