Live Updates

جہانگیر خان کی کامیابی کی حیرت انگیز اور متاثرکن کہانی منظرِ عام پر

منگل 20 مئی 2025 23:03

لاہور(اُردو پوائنٹ اخبارتازہ ترین - آن لائن۔ 20 مئی2025ء)جہانگیر خان پاکستان کے سابق اسکواش عالمی چیمپئن اور قومی ہیرو ہیں، جنہوں نے 555 مسلسل جیتوں کا عالمی ریکارڈ قائم کیا۔ ان کی کامیاب زندگی اور کامیاب کیریئر پر گفتگو کرنا نوجوانوں کے لیے ایک ترغیب سے کم نہیں ہے۔حال ہی میں وہ ایک پروگرام میں مہمان تھے۔ اس دوران انہوں نے اپنی کامیابی اور کیریئر کی ایک حیرت انگیز کہانی شیئر کی۔

جہانگیر خان اسکواش کے کھلاڑیوں کے خاندان سے تعلق رکھتے تھے، مگر ان کی زندگی کچھ مختلف تھی۔انہوں نے انکشاف کیا کہ وہ پیدائش کے وقت ہی ایک جینیاتی ہرنیا کا شکار تھے اور ڈاکٹروں نے ان کے والد کو بتایا تھا کہ وہ اپنے خاندان کے دیگر افراد کی طرح اسکواش نہیں کھیل سکیں گے۔جہانگیر خان نے بتایا کہ ان کی والدہ وہ مضبوط سپورٹ تھیں جن کی بدولت وہ اس چیلنج کا مقابلہ کر سکے۔

(جاری ہے)

5 اور 12 سال کی عمر میں انہوں نے دو سرجریز کرائیں، اور دوسرے آپریشن کے بعد ڈاکٹروں نے ان کے والدین کو بتایا کہ ان کا اسکواش کا خواب کبھی پورا نہیں ہوگا۔لیکن ان کے والدین نے ہمت نہیں ہاری اور جہانگیر خان نے بھی محنت جاری رکھی۔ 16 سال کی عمر میں انہوں نے مسلسل چیمپئن شپ جیتنا شروع کیں اور پھر عالمی سطح پر ایک مشہور کھلاڑی بن گئے۔جہانگیر خان کے ڈاکٹر ہمیشہ ان کے میچز دیکھتے تھے اور ہر بار ان کی کامیابی پر حیران ہو جاتے تھے۔یاد رہے کہ جہانگیر خان اپنے کیرئیر میں 6 بار ورلڈ اسکواش چیمپئن اور 10 مرتبہ برٹش اوپن جیت چکے ہیں جب کہ وہ 6 سال تک ورلڈ اسکواش فیڈریشن کے صدر بھی رہے ہیں۔