Live Updates

پاکستان اور بنگلہ دیش کے درمیان ٹی ٹونٹی سیریز کا شیڈول تبدیل

بنگلہ دیش بورڈ کی منظوری کے بعد نئے شیڈول کا باضابطہ اعلان کیا جائے گا

ذیشان مہتاب منگل 20 مئی 2025 13:05

پاکستان اور بنگلہ دیش کے درمیان ٹی ٹونٹی سیریز کا شیڈول تبدیل

لاہور (اردو پوائنٹ تازہ ترین اخبار ۔ 20 مئی 2025ء ) پاکستان اور بنگلہ دیش کے درمیان مجوزہ ٹی ٹونٹی سیریز کا شیڈول تبدیل کر دیا گیا ہے۔

پاکستان کرکٹ بورڈ (پی سی بی) نے نیا مجوزہ شیڈول بنگلہ دیش کرکٹ بورڈ (بی سی بی) کو منظوری کے لیے ارسال کر دیا ہے۔

تفصیلات کے مطابق ذرائع کا کہنا ہے کہ بنگلہ دیش بورڈ کی منظوری کے بعد نئے شیڈول کا باضابطہ اعلان کیا جائے گا۔

ابتدائی منصوبے کے تحت مہمان ٹیم کو 21 مئی کو پاکستان پہنچنا تھا، تاہم اب 23 مئی کو آمد متوقع ہے۔ دوسری جانب بنگلہ دیش نے متحدہ عرب امارات (یو اے ای) کے خلاف پہلے 2 کی بجائے 3 ٹی ٹونٹی میچز کھیلنے کا فیصلہ کیا ہے جس کے باعث سیریز کا شیڈول متاثر ہوا۔

تبدیل شدہ مجوزہ شیڈول کے تحت پاکستان اور بنگلہ دیش کے درمیان تین ٹی ٹوئنٹی میچز یکم، 3 اور 5 جون کو لاہور کے قذافی اسٹیڈیم میں کھیلے جائیں گے۔

(جاری ہے)

یاد رہے کہ ابتدائی پلان کے مطابق پانچ میچز پر مشتمل سیریز کے دو میچز فیصل آباد جبکہ تین میچز لاہور میں شیڈول تھے، تاہم اب مختصر شدہ سیریز لاہور میں ہی منعقد ہوگی۔

پی سی بی حکام کا کہنا ہے کہ شیڈول میں تبدیلی باہمی مشاورت سے ہوئی ہے اور حتمی اعلان بنگلہ دیش کرکٹ بورڈ کی منظوری کے بعد کیا جائے گا۔