وزیر اعلیٰ خیبر پختونخوا علی امین خان گنڈاپور کی زیر صدارت سالانہ ترقیاتی پروگرام پر پیشرفت بارے جائزہ اجلاس

پشاور (اُردو پوائنٹ اخبارتازہ ترین - اے پی پی۔ 20 مئی2025ء) وزیر اعلیٰ خیبر پختونخوا علی امین خان گنڈاپور کی زیر صدارت سالانہ ترقیاتی پروگرام پر پیشرفت کا جائزہ لینے کےلئے اجلاسوں کا سلسلہ جاری ہے۔ منگل کو ہونے والے سات گھنٹے طویل اجلاس میں مختلف محکموں کے جاری سالانہ ترقیاتی پروگرام میں شامل منصوبوں پر پیشرفت کا جائزہ لیا گیا،ان محکموں میں اعلیٰ تعلیم، صحت، لائیو اسٹاک، زراعت، ریونیو اور مواصلات و تعمیرات شامل ہیں۔

متعلقہ کابینہ اراکین، ایڈیشنل چیف سیکرٹری منصوبہ بندی، متعلقہ انتظامی سیکرٹریز اور دیگر اعلیٰ حکام نے اجلاس میں شرکت کی۔ متعلقہ انتظامی سیکرٹریز کی طرف سے اپنے محکموں کے جاری ترقیاتی منصوبوں پر پیشرفت بارے تفصیلی بریفنگ دی گئی۔

(جاری ہے)

اجلاس میں نئے مالی سال کے سالانہ ترقیاتی پروگرام میں شامل کرنے کےلئے مجوزہ منصوبوں پر بھی غوروخوص کیا گیا۔

وزیر اعلیٰ نے متعلقہ حکام کو رواں مالی سال کے آخر تک جاری ترقیاتی منصوبوں پر پیشرفت کے مقررہ ہدف کا حصول یقینی بنانے کی ہدایت کی اور واضح کیا کہ کام کے معیار پر سمجھوتہ کئے بغیر ترقیاتی منصوبوں کی مقررہ مدت میں تکمیل یقینی بنائی جائے، مالی سال کے آخر تک ترقیاتی منصوبوں کےلئے جاری کردہ فنڈز کے سو فیصد استعمال کو یقینی بنایا جائے۔

مزید برآں انہوں نے اگلے بجٹ میں جاری منصوبوں کی بروقت تکمیل کو پہلی ترجیح دینے کی ہدایت کرتے ہوئے کہا کہ جن منصوبوں پر 80 فیصد یا اس سے زیادہ پیشرفت ہو چکی ہے انہیں فوری طور پر مکمل کیا جائے۔ علی امین گنڈاپور نے ہدایت کی کہ نئے ترقیاتی پروگرام میں شامل کرنے کےلئے وسیع تر عوامی مفاد کے ایسے منصوبے تجویز کئے جائیں جو دور رس اثرات کے حامل ہوں۔

وزیر اعلیٰ کا کہنا تھا کہ ترقیاتی فنڈ عوام کے ٹیکس کا پیسہ ہے اس کا دانشمندانہ استعمال یقینی بنانا ہے، ترقیاتی فنڈز صرف ان منصوبوں پر خرچ کئے جائیں گے جن کا براہ راست فائدہ عوام کو پہنچتا ہو۔ وزیر اعلیٰ نے فوڈ سکیورٹی کو نہ صرف صوبے بلکہ پورے ملک کا ایک سنگین مسئلہ قرار دیتے ہوئے کہا کہ اس مسئلے سے نمٹنے کےلئے بروقت اور سنجیدہ اقدامات کی ضرورت ہے، لائیو اسٹاک کا شعبہ اس سلسلے میں اہمیت کا حامل ہے جو غذائی خود کفالت میں اہم کردار ادا کرسکتا ہے۔

وزیر اعلیٰ نے کہا کہ لائیو اسٹاک کے شعبے کی استعداد سے بھر پور استفادہ کرنے کےلئے اس شعبے کو جدید خطوط پر استوار کرنے کی ضرورت ہے۔ علی امین گنڈاپور نے ہدایت کی کہ اگلے ترقیاتی پروگرام کےلئے لائیو اسٹاک کے شعبے کےلئے ایسے منصوبے تجویز کئے جائیں جو پیداوار کو بڑھانے کے ساتھ ساتھ لوگوں کےلئے روزگا کے مواقع بھی پیدا کرسکیں۔ انہوں تاکید کی کہ صوبے میں زراعت اور لائیو اسٹاک کے شعبوں میں بہت زیادہ پوٹنشیلز موجود ہیں، ان سے بھر پور انداز میں استفادہ کرنے کےلئے مربوط حکمت عملی کے تحت اقدامات کئے جائیں، زراعت کے شعبے میں ٹنل فارمنگ اور ورٹیکل فارمنگ جیسے جدید طریقے متعارف کروائے جائیں۔

وزیر اعلیٰ نے زراعت کے شعبے میں جدید تحقیق کے فروغ اور آبی وسائل کے تحفظ کےلئے اقدامات کرنے کی ہدایت کی ہے۔ اسی طرح انہوں نے ٹھوس اور حقائق پر مبنی اعدادوشمار کی دستیابی کےلئے دیگر شعبوں کی طرح لائیو اسٹاک اور زراعت کے شعبوں میں بھی ڈیجیٹائزیشن کا عمل شروع کرنے کی ہدایت کی ہے۔ وزیر اعلیٰ نے روڈ سیکٹر میں تکمیل کے قریب تمام اسکیموں کو ترجیحی بنیادوں پر مکمل کرنے کی ہدایت کرتے ہوئے کہا کہ نئے ترقیاتی پروگرام کی تیاری کےلئے منتخب عوامی نمائندوں سے مشاورت کر رہے ہیں، مقامی نمائندے عوام کی ضروریات سے آگاہ ہیں، ہم عوامی ضرورت کی بنیاد پر اگلے ترقیاتی پروگرام میں نئی اسکیمیں شامل کریں گے۔

وزیر اعلیٰ نے صحت اور تعلیم کو اپنی حکومت کے ترجیحی شعبے قرار دیتے ہوئے کہا کہ اگلے بجٹ میں ان شعبوں پر زیادہ سرمایہ کاری کریں گے، پہلے سے قائم صحت مراکز خصوصاً دور افتادہ علاقوں کے مراکز میں سہولیات کی فراہمی پر خصوصی توجہ دی جائے گی۔ علی امین گنڈاپور کا کہنا تھا کہ تعلیمی اداروں میں ناپید سہولیات کی فراہمی کےلئے بھی ٹھوس اقدامات کئے جائیں گے۔وزیراعلیٰ نے عوام کی سہولت کےلئے ریونیو ریکارڈ کی کمپیوٹرائزیشن اور سروس ڈیلیوری سنٹرز کے قیام کو انتہائی ضروری اور صوبائی حکومت کی اہم ترجیح قرار دیتے ہوئے متعلقہ حکام کو ان منصوبوں پر کام کی رفتار تیز کرکے انہیں جلد مکمل کرنے کےلئے ضروری اقدامات کی ہدایت کی ہے۔