Live Updates

لاہور چیمبر کے عہدیداروں کی فیلڈ مارشل سید عاصم منیر کو مبارکباد

بدھ 21 مئی 2025 17:05

لاہور (اُردو پوائنٹ اخبارتازہ ترین - اے پی پی۔ 21 مئی2025ء) لاہور چیمبر آف کامرس اینڈ انڈسٹری کے صدر میاں ابوذر شاد،سینئر نائب صدر انجینئر خالد عثمان اور نائب صدر شاہد نذیر چودھری نے چیف آف آرمی سٹاف جنرل عاصم منیر کو فیلڈ مارشل کے عہدے پر ترقی کی مبارکباد دیتے ہوئے اس اہم ترین پیش رفت کو قومی فخر، فیلڈ مارشل حافظ سید عاصم منیر کی پاکستان کی خود مختاری،استحکام اور امن کیلئے انتھک کوششوں کا اعتراف قرار دیا ہے۔

بدھ کو جاری مشترکہ بیان میں لاہور چیمبر آف کامرس اینڈ انڈسٹری کے عہدیداروں نے کہا کہ کاروباری برادری فیلڈ مارشل حافظ سید عاصم منیر کی جانب سے قانون و انصاف کی حکمرانی، سکیورٹی اداروں پر عوامی اعتماد کی بحالی اور مشکل حالات میں ملکی معیشت کے استحکام کیلئے کردار کو بے حد سراہتی ہے۔

(جاری ہے)

انہوں نے امید ظاہر کی کہ فیلڈ مارشل حافظ سید عاصم منیر کی قیادت میں دہشت گردی، انتہا پسندی اور سرحد پار خطرات جیسے سنگین مسائل کے خلاف مو ثر اور عملی اقدامات اٹھائے جائیں گے جنہوں نے قومی ترقی اور کاروباری ماحول کو متاثر کیا ہے۔

لاہور چیمبر کے عہدیداران نے کہا کہ دہشت گردی نہ صرف انسانی جانوں کیلئے خطرہ ہے بلکہ یہ معاشی سرگرمیوں کو مفلوج کرتی ہے،تجارت میں رکاوٹ پیدا کرتی ہے اور سرمایہ کاروں کا اعتماد مجروح کرتی ہے۔ایک پرامن اور محفوظ پاکستان ہی سرمایہ کاری کو فروغ دینے،برآمدات میں اضافے اور صنعتی ترقی کیلئے بنیاد فراہم کر سکتا ہے۔انہوں نے توقع کا اظہار کیا کہ فیلڈ مارشل حافظ سید عاصم منیر کی قیادت میں پاکستان ایک نیا سفر شروع کرے گا۔صدر لاہور چیمبر آف کامرس اینڈ انڈسٹری میا ںابوذر شاد نے کہا کہ لاہور چیمبر اور کاروباری برادری افواج پاکستان کے شانہ بشانہ کھڑی ہے اور ملکی سلامتی و ترقی کیلئے ہر ممکن تعاون جاری رکھے گی۔