جنرل عاصم منیر کو فیلڈ مارشل بنانا اور ایئر چیف کی مدت ملازمت میں توسیع قابل تحسین ہے،میاں زاہدحسین

کراچی(اُردو پوائنٹ اخبارتازہ ترین - این این آئی۔ 22 مئی2025ء)نیشنل بزنس گروپ پاکستان کے چیئرمین، پاکستان بزنس مین اینڈ انٹلیکچولزفورم وآل کراچی انڈسٹریل الائنس کے صدر، ایف پی سی سی آئی پالیسی ایڈوائزری بورڈ کے چیئرمین اورسابق صوبائی وزیرمیاں زاہد حسین نے کہا ہے کہ حالیہ پاک بھارت جنگ کے فاتح جنرل سید عاصم منیر کی فیلڈ مارشل کے عہدے پر ترقی اور ایئر چیف مارشل ظہیر بابر سندھو کو ملازمت میں توسیح دینا حکومت پاکستان کا انتہائی شاندار فیصلہ ہے اور پوری پاکستانی قوم کی جانب سے اپنی فاتح افواج کے لیے شاندار تحفہ ہے جس سے مسلح افواج کا مورال مزید بلند ہوگا۔

اس فیصلے سے پاکستان کے دوستوں اور دشمنوں سب کو یہ پیغام جائے گا کہ پاکستانی ایک انتہائی غیور اور ذمہ دار قوم ہیں اور اپنے ہیروز کی قدر کرنا جانتے ہیں۔

(جاری ہے)

دوسری طرف شکست خوردہ بھارت اپنی خفت مٹانے کے لیے کوشاں ہے مگراسکی سفارتی کوششیں بھی عسکری ایڈونچرکی طرح ناکام رہیں گی اور بلاول بھٹو زرداری کی قیادت میں پاکستانی سفارتی مشن سفارتی محاذ پر بھی دشمن کے دانت کھٹے کرے گا۔

پاکستانی قوم پوری طرح متحد اور افواج مکمل طورپرچوکس ہیں اورکسی بھی ممکنہ بھارتی جارحیت کا منہ توڑجواب دینے کے لیے تیارہیں۔ میاں زاہد حسین نے کاروباری برادری سے بات چیت کرتے ہوئے کہا کہ پاکستان نے صرف بھارتی فوجی اہداف کو نشانہ بنایا ہے جبکہ بھارت نے عام شہریوں، خواتین، بچوں اورمساجد پرحملے کیے جس سے اسکی چھوٹی زہنیت کا پتہ چلتا ہے۔

بھارت کی جانب سے دنیا کوگمراہ کرنے کے لیے ارکانِ پارلیمنٹ پرمشتمل وفود بیرونِ ملک بھیجے جا رہے ہیں تاکہ فالس فلیگ آپریشن اور آپریشن سندھور کے جھوٹے بیانیے کوفروغ دیا جا سکے۔ اس کے جواب میں وزیراعظم میاں شہباز شریف نے بھی سفارتی سرگرمیوں میں تیزی لانے اورعالمی برادری کوبھارت کے ناپاک عزائم سے آگاہ کرنے کا فیصلہ کیا ہے جس سے بھارت کی سفارتی تنہائی بڑھے گی۔

پہلگام فالس فلیگ کی آڑمیں بھارت کی جارحیت کے بعد امریکی صدرنے مسئلہ کشمیرپرثالثی کی پیشکش کرکے دنیا کی توجہ اصل تنازع کی طرف مبذول کرائی ہے۔ برطانوی پارلیمنٹ میں بھی مسئلہ کشمیرپربحث ہوئی جہاں بھارتی مظالم پرشدید تنقید کی گئی اورکشمیری عوام کے بنیادی انسانی حقوق کی حمایت کی گئی۔ میاں زاہد حسین نے کہا کہ چند روزہ جنگ میں کشمیر، دہشت گردی اورپانی کا مسئلہ شدت سے سامنے آیا ہے۔

بھارتی وزیراعظم کی جانب سے سندھ طاس معاہدے کومعطل کرنے کے اعلان کا مطلب ہے کہ بھارت دریائے سندھ کا پانی پاکستان آنے سے روکنے کا ارادہ رکھتا ہے جوایک سنگین مگر بزدلانہ قدم ہوگا جس کا انجام بھرپورتصادم کی صورت میں نکلے گا۔ حکومت پاکستان پہلے ہی خبردارکرچکی ہے کہ اگرپانی روکا گیا تواس کے نتائج نسلوں تک محسوس کیے جائیں گے۔ میاں زاہد حسین نے کہا کہ فوج کے ترجمان نے یہ بھی واضح کیا ہے کہ بھارت امریکا نہیں ہے اور پاکستان غزہ یا فلسطین نہیں ہے۔

اللہ کے فضل و کرم سیپاکستان نہ کبھی جھکا ہے نہ جھکے گا بلکہ اینٹ کا جواب پتھرسے دے گا۔ میاں زاہد حسین نے کہا کہ پاکستان امن چاہتا ہے لیکن دفاع کے لیے ہر وقت تیارہے۔ جوملک پاکستان جیسے نسبتاً چھوٹے ملک سے باربارمارکھاتا ہے اُسے چین جیسی سپرپاورکے خلاف مہرے کے طورپر استعمال کرنے کے خواب دیکھنے والے احمقوں کی جنت میں رہتے ہیں۔ بھارت کوخطے کے تھانیداربننے کا خبط چھوڑکراپنی اوقات میں رہنا چاہیے۔ اگربھارت بازنہ آیا تو اسے ایک بارپھروہی انجام بھگتنا پڑے گا جوماضی میں ابھی نندن کی شکل میں دیکھ چکا ہے۔ پاکستان کوجھکانے کی خواہش بھارت کوبرباد اور ٹکڑے ٹکڑے کردے گی۔