تنخواہوں کی عدم ادائیگی پربلدیاتی اسکولوں کے اساتذہ کا احتجاج

کراچی (اُردو پوائنٹ اخبارتازہ ترین - این این آئی۔ 21 مئی2025ء) تنخواہوں کی عدم ادائیگی پربلدیاتی اسکولوں کے اساتذہ کا نیو کراچی ٹاؤن آفس کے اندر اپنے جائز مطالبات کے حق میں احتجاج۔ مظاہرین میں مرد و خواتین اساتذہ کی بڑی تعداد شامل تھی، جو ہاتھوں میں بینرز اور پلے کارڈز اٹھائے ہوئے اپنے مطالبات کے حق میں نعرے لگا رہے تھے۔ اساتذہ کا کہنا تھا کہ گزشتہ دو ماہ سے انہیں تنخواہیں ادا نہیں کی گئیں جس کی وجہ سے ان کے گھروں کے چولہے ٹھنڈے پڑ گئے ہیں اور مالی مشکلات اس قدر بڑھ چکے ہیں کہ بچوں کے اسکول کی فیس، راشن، بجلی اور پانی کے بل تک ادا کرنا ممکن نہیں رہا۔

احتجاج کے دوران اساتذہ نے کہا کہ نیو کراچی ٹاؤن کے بلدیاتی اسکولوں میں عرصہ دراز سے تعلیمی سہولیات کا فقدان ہے اور اس کے ساتھ ساتھ اساتذہ کو وقت پر تنخواہوں کی ادائیگی نہ ہونا نہ صرف ایک مجرمانہ غفلت ہے بلکہ اساتذہ کے ساتھ شدید ناانصافی بھی ہے۔

(جاری ہے)

مظاہرین کا کہنا تھا کہ ٹائم اسکیل کی منظوری کے باوجود اساتذہ کی تنخواہوں میں تاخیر ناقابل برداشت صورتحال پیدا کر رہی ہے۔

اس موقع پر چیئرمین نیو کراچی ٹاؤن محمد یوسف، مونسپل کمشنر ایاز حمید اللہ بلوچ اور وائس چیئرمین شعیب بن ظہیر اساتذہ کے درمیان پہنچے اور ان کے مسائل سنے۔ چیئرمین محمد یوسف نے اساتذہ سے گفتگوکرتے ہوئے کہا کہ وہ اساتذہ کے مسائل سے پوری طرح آگاہ ہیں اور ان کی عزت و وقار کا تحفظ اور تنخواہوں کی بروقت ادائیگی ہماری اولین ترجیح ہے۔چیئرمین محمد یوسف کا کہنا تھا کہ ٹائم اسکیل کی منظوری کے عمل میں بعض انتظامی بے ضابطگیوں کی شکایات سامنے آئی تھیں جن کی تحقیقات جاری ہیں اور جیسے ہی انکوائری مکمل ہوگی اساتذہ کو ان کے جائز حق کے مطابق ٹائم اسکیل کی بنیاد پر تنخواہیں ادا کر دی جائیں گی۔

چیئرمین محمد یوسف نے یقین دہانی کرائی کہ نہ صرف تنخواہوں کی ادائیگی جلد کی جائے گی بلکہ آئندہ اس قسم کی صورتحال سے بچنے کے لیے ایک مستقل لائحہ عمل بھی مرتب کیا جارہا ہے۔انہوں نے مزید کہا کہ اساتذہ ہمارے معاشرے کا وقار ہیں اور ان کے مسائل کو نظر انداز کرنا کسی صورت مناسب نہیں۔ '' اساتذہ قوم کے معمار ہوتے ہیں اور ایک استاد کا حق ہے کہ اسے بروقت اس کی محنت کا صلہ ملے۔

میں اس احتجاج کو مثبت سمجھتا ہوں کیونکہ یہ اپنے حق کے لیے آواز اٹھانے کا جمہوری طریقہ ہے۔وائس چیئرمین شعیب بن ظہیر نے اساتذہ سے اظہار یکجہتی کرتے ہوئے کہا کہ چیئرمین محمد یوسف کی خصوصی ہدایت پر اساتذہ کے مسائل کو فوری حل کرنے کے لیے اقدامات کیے جا رہے ہیں اور آئندہ چند روز میں تنخواہوں کی ادائیگی کا سلسلہ شروع ہو جائے گا۔نیو کراچی ٹاؤن میں بلدیاتی اسکولوں کے نظام کو جدید خطوط پر استوار کرنے اور اساتذہ کی فلاح و بہبود کے لیے عملی اقدامات کیے جائیں گے۔احتجاج میں شریک اساتذہ نے چیئرمین محمد یوسف اور انتظامیہ کی یقین دہانی کے بعد احتجاج مؤخر کرتے ہوئے کہا کہ انتظامیہ اپنی یقین دہانی کو عملی جامہ پہنائے گی اور ان کے مالی مسائل جلد از جلد حل کیے جائیں گے۔