چیئرمین سینیٹ کی خضدار میں اسکول بس پر دھماکے کی شدید مذمت

معصوم بچوں کو دہشت گردی کا نشانہ بنانا انتہائی قابل افسوس، بزدلانہ اور انسانیت سوز عمل ہے،یوسف رضاگیلانی

بدھ 21 مئی 2025 22:15

اسلام آباد(اُردو پوائنٹ اخبارتازہ ترین - این این آئی۔ 21 مئی2025ء)چیئرمین سینیٹ سید یوسف رضا گیلانی نے خضدار میں زیرو پوائنٹ پر سکول بس پر ہونے والے دھماکے کی شدید الفاظ میں مذمت کی ہے ۔جاری بیان میں چیئرمین سینیٹ نے کہاکہ معصوم بچوں کو دہشت گردی کا نشانہ بنانا انتہائی قابل افسوس، بزدلانہ اور انسانیت سوز عمل ہے۔ انہوں نے کہاکہ اس دلخراش واقعے نے پوری قوم کو غمزدہ کر دیا ہے۔

(جاری ہے)

سید یوسف رضا گیلانی نے شہدا کے اہل خانہ سے دلی ہمدردی اور تعزیت کا اظہار کرتے ہوئے کہاکہ ہم ان کے غم میں برابر کے شریک ہیں۔ انہوں نے زخمی طلبا کی جلد صحتیابی کیلئے دعا کی اور متعلقہ حکام کو ہدایت کی کہ زخمیوں کو بہترین طبی سہولیات فراہم کی جائیں۔چیئرمین سینیٹ نے کہاکہ دہشت گردی میں ملوث عناصر کو جلد از جلد گرفتار کرکے قانون کے کٹہرے میں لایا جاے گا اور اس قسم کے واقعات کی روک تھام کے لیے موثر اقدامات کیے جائیں۔