Live Updates

qبلوچستان میں مردہ سیاسی ماحول تکلیف دہ ہے، لشکری رئیسانی

جمعرات 22 مئی 2025 22:15

۵کوئٹہ (اُردو پوائنٹ اخبارتازہ ترین - آن لائن۔ 22 مئی2025ء) سینئر سیاست دان سابق سینیٹر نوابزادہ حاجی میر لشکری خان رئیسانی نے کہا کہ بلوچستان میں مردہ سیاسی ماحول تکلیف دہ ہے، سیاسی عمل کے ذریعے صوبے کے جملہ قومی امور پر حقیقی سیاسی کارکنوں کو متحرک کررہے ہیں، بلوچستان کے لوگوں نے سیاسی کارکنوں کے لبادے میں سیاسی عمل پر مسلط ٹھیکیداروں، عقیدت مندوں اور سہولت کاروں کے خلاف بڑی جنگ لڑنی ہے، طلبا تعلیمی اداروں سے صوبے میں علمی ماحول کا آغاز کریں۔

یہ بات انہوں نے جمعرات کو سراوان ہاوس میں بلوچستان یونیورسٹی میں زیر تعلیم طلبا کے ایک وفد سے ملاقات میں گفتگو کرتے ہوئے کہی۔ نوابزادہ حاجی میر لشکری خان رئیسانی نے کہا کہ سیاست پیٹ کیلئے نہیں آئندہ نسلوں کی بقا، ترقی و خوشحال کیلئے کررہے ہیں، بلوچستان کی قومی خود داری پر سمجھوتہ نہیں کریں گے انہوں نے کہاکہ پارٹیوں میں ٹھیکیدار، عقیدت مند، سہولت کار سیاسی کارکنوں کے لبادے میں سیاسی عمل پر مسلط ہیں ان کے خلاف صوبے کے لوگوں نے ایک بہت بڑی سیاسی جنگ لڑنی ہے، سیاسی عمل کے ذریعے شعوری لوگوں کو ایک پلیٹ فارم پر اکٹھا کرکے بلوچستان کے جملہ قومی امور پر سیاسی کارکنوں کو متحرک کررہے ہیں۔

(جاری ہے)

انہوں نے کہا کہ قوموں کی زندگیوں میں عروج اور زوال آتے رہتے ہیں تاہم سنجیدہ قومیں ہی ان بحرانوں اور افراتفری سے نکل پاتے ہیں۔ انہوں نے کہا کہ قوموں کی زندگیوں میں وقت انتہائی اہم ہوتا ہے، صوبے کے لوگوں کا مزید وقت ضائع نہ ہو اس کیلئے حقیقی سیاسی کارکنوں کی فکری شعوری و سائنسی بنیادوں پر زہن سازی کررہے ہیں۔ انہوں نے کہا کہ قومی سفر کا تعین کرکے صوبے کے ہر فرد کو انفرادی و اجتماعی ذمہ داری قبول کرنا ہوگی، طلبا اپنی تعلیم کی طرف توجہ دیں اور یونیورسٹیوں سے علمی ماحول کی ابتدا کرکے بحران سے نکلنے میں اپنا کردار ادا کریں۔