Live Updates

مقبوضہ کشمیر کی ابتر صورتحال کی ذمہ دار بی جے پی ہے، نائب وزیر اعلیٰ

ہفتہ 24 مئی 2025 11:31

سرینگر (اُردو پوائنٹ اخبارتازہ ترین - اے پی پی۔ 24 مئی2025ء) بھارت کے غیر قانونی زیر تسلط جموں و کشمیر میں نائب وزیر اعلی سریندر کمار چودھری نے کہا ہے کہ نیشنل کانفرنس کی حکومت علاقے کی خصوصی اور ریاستی حیثیت کی بحالی کے لیے سیاسی جدوجہد کر رہی ہے۔

(جاری ہے)

کشمیر میڈیا سروس کے مطابق سریندر کمار نے سری نگر میں ذرائع ابلاغ کے نمائندوں سے گفتگو کرتے ہوئے مقبوضہ علاقے کی ابتر صورتحال کا ذمہ دار بھارتیہ جنتا پارٹی (بی جے پی) اور اس کے اتحادیوں کو ٹھہرایا۔

انہوں نے کہا کہ وہ بی جے پی اور اسکے اتحادیوں سے پوچھنا چاہتے ہیں کہ گزشتہ دس برسوں کے دوران انہوں نے کشمیر میں کیا کیا۔ انہوں نے کہا کہ ان لوگوں نے دفعہ 370کو غیر قانونی طور پر منسوخ کیا اور جموں وکشمیر کو مرکز کے زیر انتظام علاقہ بنایا۔سریندر کمار نے مزید کہا کہ وزیر اعلیٰ عمر عبداللہ کی قیادت میں علاقے کے آئینی حقوق اور سیاسی وقار کی بحالی کے لیے کوششیں جاری ہیں۔