مکہ میں حج پرمٹ کے بغیر داخل ہونے والوں کی نگرانی کے لیے ڈرون کا استعمال

ہفتہ 24 مئی 2025 11:59

ریاض (اُردو پوائنٹ اخبارتازہ ترین - اے پی پی۔ 24 مئی2025ء) مکہ مکرمہ میں حج سکیورٹی فورسز اور دیگر ادارے غیرقانونی طریقے سے داخل ہونے والوں کی نگرانی کے لیے جدید ٹیکنالوجی کا استعمال کر رہے ہیں۔اردو نیوز کے مطابق حج سکیورٹی فورسز کی مختلف ٹیمیں زمین کے علاوہ فضائی نگرانی بھی جامع انداز میں کر رہی ہیں۔جدید ٹیکنالوجی استعمال کرتے ہوئے مکہ مکرمہ کے چاروں اطراف میں ڈرونز کا استعمال کیا جا رہا ہے تاکہ چور راستوں کا استعمال کرنے والوں کو مکہ مکرمہ میں داخل ہونے سے روکا جا سکے۔

حج ٹاسک فورسز کی ٹیمیں فضائی نگرانی کے لیے خصوصی ڈرونز استعمال کر رہی ہیں جن میں انتہائی جدید اور حساس کیمرے نصب ہیں جن کے ذریعے رات کے وقت بھی بہتر طورپر راستوں کی نگرانی کی جا سکتی ہے۔

(جاری ہے)

ڈرونز نگران سینٹر کو موصول ہونے والی وڈیو کے ذریعے گراؤنڈ کنٹرول ٹاور کو مطلع کیا جاتا ہے جو قریب ترین پولیس پارٹی کو لوکیشن کے بارے میں مطلع کر تی ہے تاکہ غیرقانونی طورپر مکہ میں داخل ہونے والوں کو روکا جا سکے۔

واضح رہے کہ سعودی وزارت داخلہ نے حج سیزن کا آغاز ہوتے ہی مکہ پرمٹ کی شرط عائد کر دی تھی۔پرمٹ کے بغیر کسی کو مکہ مکرمہ میں داخل ہونے کی اجازت نہیں۔پرمٹ کا مقصد بیرون ملک سے آنے والے عازمین حج کو سہولت فراہم کرنا ہے تاکہ وہ غیرضروری ازدحام سے محفوظ رہتے ہوئے مناسک حج بہتر طور پر ادا کر سکیں۔