پرمٹ کے بغیر مکہ میں داخل ہونے والوں کی نگرانی کے لیے ڈرون کا استعمال

حج ٹاسک فورسز کی ٹیمیں فضائی نگرانی کے لیے خصوصی ڈرونز استعمال کر رہی ہیں،سعودی اخبار

ہفتہ 24 مئی 2025 15:06

مکہ مکرمہ(اُردو پوائنٹ اخبارتازہ ترین - این این آئی۔ 24 مئی2025ء)سعودی عرب کی حج سکیورٹی فورسز اور دیگر ادارے غیرقانونی طریقے سے مکہ مکرمہ داخل ہونے والوں کی نگرانی کے لیے جدید ٹیکنالوجی کا استعمال کر رہے ہیں۔سعودی اخبار کے مطابق حج سکیورٹی فورسز کی مختلف ٹیمیں زمین کے علاوہ فضائی نگرانی بھی جامع انداز میں کر رہی ہیں۔

(جاری ہے)

جدید ٹیکنالوجی استعمال کرتے ہوئے مکہ مکرمہ کے چاروں اطراف میں ڈرونز کا استعمال کیا جا رہا ہے تاکہ چور راستوں کا استعمال کرنے والوں کو مکہ مکرمہ داخل ہونے سے روکا جا سکے۔

حج ٹاسک فورسز کی ٹیمیں فضائی نگرانی کے لیے خصوصی ڈرونز استعمال کر رہی ہیں جن میں انتہائی جدید اور حساس کیمرے نصب ہیں جن کے ذریعے رات کے وقت بھی بہتر طورپر راستوں کی نگرانی کی جا سکتی ہے۔ڈرونز نگران سینٹر کو موصول ہونے والی وڈیو کے ذریعے گرانڈ کنٹرول ٹاور کو مطلع کیا جاتا ہے جو قریب ترین پولیس پارٹی کو لوکیشن کے بارے میں مطلع کرتی دیتی ہیں تاکہ غیرقانونی طورپر مکہ میں داخل ہونے والوں کو روکا جا سکے۔