امریکا، ٹیسلا کی آٹو پائلٹ کار حادثے کا شکار ، سسٹم کی جانچ پڑتال ہو گی

منگل 27 مئی 2025 08:50

نیویارک (اُردو پوائنٹ اخبارتازہ ترین - اے پی پی۔ 27 مئی2025ء) دنیا کے امیر ترین شخص ایلون مسک کی کارساز کمپنی ٹیسلا کی آٹو پائلٹ گاڑی امریکی ریاست پنسلوینیا میں حادثے کا شکار ہو گئی۔ رائٹرز کے مطابق ریاست کی پولیس کا کہنا ہے کہ آٹو پائلٹ نظام کے تحت چلنے والی کار ہائی وے پر ایک ٹرک کے ساتھ ٹکرائی۔

(جاری ہے)

پولیس کے مطابق گاڑی سڑک کی درمیانی لین میں سفر کر رہی تھی اور وہ اسی لین میں دائیں طرف ٹریفک کی بندش کے لیے کھڑے کیے جانے والے ٹرک کے ساتھ ٹکرا گئی۔

پولیس کا کہنا ہے کہ گاڑی کے آٹو پائلٹ سسٹم کی جانچ پڑتال کی جائے گی۔پولیس کا یہ بھی کہنا تھا کہ حادثے کے وقت گاڑی آٹو پائلٹ نظام کے تحت چل رہی تھی تاہم وہ اپنا توازن کھو بیٹھی اور حادثے کا شکار ہوئی۔گاڑی میں ایک 18 سالہ نوجوان موجود تھا جس کو لاپرواہی سے ڈرائیونگ کرنے کے الزام میں حراست میں لیا گیا ہے۔پولیس کا کہنا ہے کہ گاڑی میں موجود شخص زخمی ہونے سے محفوظ رہا۔