کراچی‘ ڈیفنس کی موبائل شاپ پر ڈکیتی، 4 ملزمان لاکھوں کے فونز لے گئے

آئی فون سمیت 21مہنگے موبائل فون لے گئے‘ سی سی ٹی وی ویڈیو منظر عام پر آگئی‘ملزمان کے چہرے واضح ہیں

منگل 27 مئی 2025 16:32

کراچی(اُردو پوائنٹ اخبارتازہ ترین - این این آئی۔ 27 مئی2025ء) ڈیفنس میں کار سوار 4 ملزمان موبائل فون کی دکان سے لاکھوں مالیت کے آئی فونز اور دیگر موبائل فونز لوٹ کرلے گئے۔گزشتہ روز ہونے والی واردات کی سی سی ٹی وی ویڈیو منظر عام پر آگئی ہے جس میں ملزمان کے چہرے واضح ہیں۔پولیس کے مطابق ڈیفنس فیز 5 بدر کمرشل میں کار سوار 4 ملزمان نے موبائل شاپ لوٹ لی۔

(جاری ہے)

ویڈیو میں دیکھا گیا کہ 4 ملزمان کار میں آئے اور 3ملزمان دکان میں داخل ہوئے، پہلا سفید شلوار قمیض پہنا ملزم موبائل فون پر بات کرتے ہوئے دکان میں داخل ہوا اس کے بعد سبز اور نیلے شلوار قمیض پہنے 2 ملزم بھی دکان میں داخل ہوئے۔ملزمان نے اسلحہ دکھاکر دکاندار کو یرغمال بنایا اور آئی فون سمیت 21مہنگے موبائل فون لے گئے۔پولیس کو واقعے کی اطلاع کردی گئی ہے اور پولیس کی جانب سے تحقیقات کا سلسلہ جاری ہے۔