پہلگام فالس فلیگ،کوئی ثبوت پیش نہ کرنے پر مودی سرکار سے کڑے سوالات

منگل 27 مئی 2025 21:46

نئی دہلی (اُردو پوائنٹ اخبارتازہ ترین - آن لائن۔ 27 مئی2025ء) پہلگام فالس فلیگ کے بعد اب تک بھارتی عوام کے سوالات کا سلسلہ جاری ہے کیونکہ مودی کی جانب سے ابھی تک کوئی ثبوت پیش نہیں کیے گئے۔بھارتی شہری کا کہنا تھا کہ پہلگام سری نگر سے تقریباً 400 کلومیٹر کے فاصلے پر واقع ہے اور سری نگر سے پہلگام کے راستے میں 11 سکیورٹی چوکیاں قائم ہیں، سوال یہ ہے کہ حملہ آور اس قدر سیکیورٹی کو عبور کرکے کیسے پہلگام پہنچ گئے۔

شہری نے سوال اٹھایا کہ ہر آنے جانے والے شخص کو مکمل طور پر چیک کیا جاتا ہے، بسوں کو بھی سیکیورٹی اہلکاروں کی جانب سے سختی سے چیک کیا جاتا ہے لیکن اس کے باوجود حملہ آور اس علاقے میں داخل ہونے میں کیسے کامیاب ہوگئے، حملہ آوروں نے کئی کلومیٹر کا فاصلہ پیدل طے کیا اور حملہ کیا۔

(جاری ہے)

بھارتی شہری کا کہنا تھا کہ اگر حملہ آور واقعی بیرونی تھے تو بی ایس ایف کی اتنی چوکیاں عبور کیسے کیں مودی کی جانب سے بغیر کسی تحقیقات کے فوراً پاکستان پر الزامات عائد کرنا غیر ذمہ دارانہ اقدام ہے۔

پاکستان اور چین دونوں نے اس حملے کی آزادانہ تحقیقات کا مطالبہ کیا لیکن بھارتی حکومت نے فوری طور پر پاکستان کو موردِ الزام ٹھہرایا۔شہری کا مزید کہنا تھا کہ بھارت کے پاس حملے سے متعلق کوئی حتمی ثبوت موجود نہیں ہے، ثبوت تب ہوتا کہ بی ایس ایف والے اگر کسی کو پکڑ لیتے، ہر بار جو بھی حملہ آ ور آتے ہیں وہ فوجی وردی میں ہی کیوں آتے ہیں۔

دفاعی ماہرین کا کہنا ہے کہ بھارتی شہری کی جانب سے اٹھائے جانے والے سوالات مودی اور بی جے پی حکومت کو کمزور ثابت کرتے ہیں، پہلگام فالس فلیگ کو ایک ماہ کا عرصہ گزر گیا لیکن اب تک تحقیقات مکمل نہیں ہوئیں اور سوالات اٹھنے کا سلسلہ جاری ہے۔ دفاعی ماہرین کے مطابق بھارت اکثر ایسے حملوں کے بعد بغیر تحقیقات کے پاکستان پر بلاجواز الزام تراشی کرتا ہے، پہلگام فالس فلیگ کے حوالے سے زمینی حقائق بھارت کے بیانیے کے برعکس ایک مختلف تصویر پیش کرتے ہیں۔