Live Updates

فیصل آباد چیمبرآف کامرس اینڈ انڈسٹری کی یوم تکبیرپرقوم کو مبارکباد پیش

منگل 27 مئی 2025 23:12

فیصل آباد (اُردو پوائنٹ اخبارتازہ ترین - آن لائن۔ 27 مئی2025ء) فیصل آباد چیمبر آف کامرس اینڈ انڈسٹری کے صدر ریحان نسیم بھراڑہ ، سینئر نائب صدر قیصر شمس گچھا اور نائب صدر شاہد ممتاز باجوہ نے یوم تکبیر پر قوم کو مبارکباد پیش کرتے ہوئے پاکستان کو دنیا کی ساتویں اور عالم اسلام کی پہلی ایٹمی قوت بنانے والوں کا شکریہ ادا کیا ہے۔انہوں نے کہا کہ پاکستان کو ایٹمی قوت بنانے کیلئے ڈاکٹر عبدالقدیر خان جبکہ ایٹمی دھماکے کرنے کے سلسلہ میں سابق وزیر اعظم میاں محمد نواز شریف کا کردار تاریخی حیثیت کا حامل ہے۔

انہوں نے کہا کہ بھارت کے حالیہ فضائی اور ڈرون حملوں کے برعکس پاکستان نے انتہائی بردباری سے کام لیا اور صرف اُن جہازوں او رمقامات کو نشانہ بنایا جہاں سے پاکستان پر حملے کئے گئے تھے۔

(جاری ہے)

انہوںنے کہا کہ پاکستان کا جوابی وار انتہائی نپا تلا تھا جس نے ٹیکنالوجیکل وار فیئر میں پاکستان کی برتری کو ثابت کر دیا۔انہوں نے کہا کہ بھارت جیسے بزدل اور مکار دشمن کی طرف سے ایٹمی دھماکوں کے بعد پاکستان کیلئے ایٹمی قوت کا حصول ناگزیر ہو گیا تھا تاکہ اس خطے میں فوجی توازن کو برقرار رکھا جا سکے۔

انہوں نے کہا کہ بھارت کے حالیہ حملے اس بات کا ثبوت ہیں کہ وہ اپنے ہمسایوں کے خلاف جارحیت کا سلسلہ آئندہ بھی جاری رکھے گا اور اس کو روکنے کیلئے ضروری تھا کہ پاکستان کو بھی ایک مضبوط اور طاقتور ایٹمی قوت بنایا جائے۔ انہوں نے کہا کہ یہی وجہ ہے کہ دونوں ملکوں کے پاس ایٹمی قوت ہونے کی وجہ سے حالیہ جنگ روایتی ہتھیاروں تک محدود رہی۔