ڈپٹی چیئرمین سینیٹ سیدال خان کی سینیٹر ڈاکٹر حافظ عبدالکریم کو مرکزی جمعیت اہلحدیث پاکستان کا امیر منتخب ہونے پر مبارکباد

بدھ 28 مئی 2025 00:30

اسلام آباد (اُردو پوائنٹ اخبارتازہ ترین - اے پی پی۔ 28 مئی2025ء) ڈپٹی چیئرمین سینیٹ سیدال خان نے سینیٹر ڈاکٹر حافظ عبدالکریم کو مرکزی جمعیت اہلحدیث پاکستان کا امیر منتخب ہونے پر دلی مبارک باد دی ہے۔ منگل کو سینیٹ سیکرٹریٹ سے جاری اعلامیہ کے مطابق ڈپٹی چیئرمین سینیٹ نے کہا کہ سینیٹر ڈاکٹر حافظ عبدالکریم ایک سلجھے سیاستدان اور زیرک پارلیمنٹیرین بھی ہیں۔

انہوں نے پارلیمنٹ، بالخصوص ایوان بالا (سینیٹ) میں قانون سازی اور قومی امور پر اہم خدمات سرانجام دی ہیں۔ ڈپٹی چیئرمین سینیٹ نے کہا کہ ڈاکٹر حافظ عبدالکریم کی قیادت نہ صرف مرکزی جمعیت اہلحدیث پاکستان بلکہ ملک و قوم کے لیے بھی سود مند ثابت ہوگی اور ان کی سیاسی بصیرت اور پارلیمانی تجربے سے جماعت کو نئی جہت اور قوت حاصل ہوگی۔

(جاری ہے)

ڈپٹی چیئرمین نے کہا کہ امید ہے کہ سینیٹر ڈاکٹر حافظ عبدالکریم کی سربراہی میں جمعیت اہلحدیث پاکستان ملکی جمہوریت کے استحکام کے فروغ میں بھرپور کردار ادا کرتی رہے گی۔

انہوں نے کہا کہ سینیٹر ڈاکٹر حافظ عبدالکریم اپنی جماعت کو منظم اور فعال بنانے کے ساتھ ساتھ مرحوم پروفیسر ساجد میر کے مشن کو بھی آگے بڑھائیں گے۔ ڈپٹی چیئرمین سینیٹ نے سینیٹر ڈاکٹر حافظ عبدالکریم کی بطور جماعت کے امیر نئی ذمہ داری پر نیک تمناؤں اور کامیابی کی دعا بھی کی۔