اسلام آباد، حریت کانفرنس آزاد کشمیر شاخ کے دفتر میں ’یوم تکبیر بارے تقریب کا انعقاد

اسلام آباد (اُردو پوائنٹ اخبارتازہ ترین - این این آئی۔ 28 مئی2025ء) کل جماعتی حریت کانفرنس آزاد جموںوکشمیر شاخ کے دفترمیں’’ یومِ تکبیر‘‘ کے سلسلے میں ایک تقریب کا انعقاد کیا گیا۔ تقریب کی صدارت کنوینر غلام محمد صفی نے کی اور اس میں حریت رہنما،دانشور، صحافی شریک تھے۔ کشمیر میڈیاسروس کے مطابق غلام محمد صفی اور دیگر مقررین نے اس موقع پرکہا کہ پاکستان کے کامیاب ایٹمی تجربات نہ صرف ایک عسکری کامیابی ہے بلکہ اسلامی دنیا کی اجتماعی عزت، وقار اور خودمختاری کا مظہر ہے۔

انہوںنے کہا کہ پاکستان نہ صرف اپنی جغرافیائی سرحدوں کا محافظ ہے بلکہ امتِ مسلمہ کے اجتماعی دفاع کی علامت بھی ہے۔مقررین نے کہا کہ پاکستان کا ایٹمی طاقت بنناپوری اسلامی دنیا کے لیے ایک مضبوط پیغام ہے کہ اگر عزت و غیرت کے ساتھ زندہ رہنا ہے تو سائنسی، دفاعی اور تکنیکی میدان میں خودانحصاری اختیار کرنا ہوگی۔

(جاری ہے)

پاکستان نے اپنی ایٹمی صلاحیت سے جنوبی ایشیا میں طاقت کا توازن بحال کیا اور دشمن کو باور کرایا کہ وہ اپنی سلامتی و خودمختاری پر ہرگز کوئی سمجھوتہ نہیںکریگا۔

انہوںنے کہا کہ پاکستان کی ایٹمی صلاحیت بھارت کے توسیع پسندانہ عزائم کی راہ میں ایک بڑی رکاوٹ ہے۔ ایٹمی دفاع پاکستان کی سلامتی کا وہ فولادی حصار ہے جو دشمن کے عزائم کو خاک میں ملا دیتا ہے۔مقررین نے ملت کے ان محسنوں کو زبردست خراج عقیدت پیش کیا جنہوں نے جنہوں نے انتہائی کٹھن حالات میں دن رات محنت کرکے پاکستان کو ایٹمی طاقت بنایا ۔

ا نہوںنے کہا کہ ڈاکٹر عبدالقدیر خان اور اٴْن کی ٹیم کی بے مثال خدمات رہتی دنیا تک یاد رکھی جائیں گی۔تقریب کے اختتام پر پاکستان کی سلامتی، امتِ مسلمہ کے اتحاد ، مقبوضہ جموںوکشمیر کی غیر قانونی بھارتی تسلط سے جلد آزادی اور شہدائے کشمیر و پاکستان کے درجات کی بلندی کیلئے دعا کی گئی۔تقریب میں کنوینر غلام محمد صفی کے علاوہ سینئر حریت رہنما محمد فاروق رحمانی ،محمود احمد ساغر،سید یوسف نسیم،محمد حسین خطیب ،شمیم شال ، مشتاق احمد بٹ ،شیخ عبد المتین ،حسن البنا،داود خان یوسفزئی،راجہ خادم حسین،سید اعجاز رحمانی ، ثنا ء اللہ ڈار،جاوید بٹ،حاجی محمد سلطان ،امتیاز وانی، زاہد صفی،راجہ شاہین ،میاں مظفر، عدیل مشتاق ،محمد شفیع ڈار ،سید گلشن، زاہد مجتبیٰ،محمد اشرف ڈار ،نزیر کرناہی،منظور احمد ڈار،عبدالمجید میر،امتیاز احمد بٹ ،عمران قاضی ،ریئس احمد میر،خالد شبیر اور دیگر شریک تھے ۔