وزیراعلیٰ سندھ مراد علی شاہ کی زیرصدارت بجٹ تجاویز پر 2 محکموں کا مشترکہ اجلاس

بدھ 28 مئی 2025 22:47

کراچی (اُردو پوائنٹ اخبارتازہ ترین - این این آئی۔ 28 مئی2025ء)وزیر اعلیٰ سندھ سید مراد علی شاہ کی زیر صدارت محکمہ خزانہ اور محکمہ منصوبہ بندی و ترقیات کا مشترکہ اجلاس منعقد ہوا جس میں آئندہ مالی سال کے بجٹ کے لیے تجاویز کو حتمی شکل دینے پر غور کیا گیا۔اجلاس میں وزیر منصوبہ بندی و ترقیات سید ناصر حسین شاہ، چیف سیکریٹری آصف حیدر شاہ، پرنسپل سیکریٹری آغا واصف، سیکریٹری خزانہ فیاض جتوئی اور دیگر متعلقہ افسران نے شرکت کی۔

وزیراعلی نے کہا کہ آج سرکاری تعطیل کے باوجود ہم نے منصوبہ بندی و ترقیات اور خزانہ کے محکموں کا اجلاس طلب کیا ہے۔ اس اجلاس کا مقصد آئندہ مالی سال کے بجٹ کو حتمی شکل دینا ہے۔انہوں نے کہا کہ میں چاہتا ہوں کہ عید سے پہلے زیادہ تر تجاویز کو حتمی شکل دی جائے۔

(جاری ہے)

وزیراعلی نے مزید کہا کہ جلد ہی مزید اجلاس بلائے جائیں گے تاکہ تمام تجاویز کو حتمی شکل دی جا سکے۔

آئندہ بجٹ عوامی مفاد کو مدنظر رکھ کر تیار کیا جائے گا۔وزیر منصوبہ بندی و ترقیات ناصر حسین شاہ نے وزیراعلی کو بتایا کہ 4,644 جاری ترقیاتی اسکیموں میں سے 1,812 اسکیمیں رواں سال مکمل ہونے کی توقع ہے۔ انہوں نے ہدایت کی کہ جو اسکیمیں تکمیل کے قریب ہیں ان کے لیے فنڈز فوری طور پر جاری کیے جائیں۔ناصر حسین شاہ نے مزید بتایا کہ مختلف محکموں نے آئندہ مالی سال کے لیے نئی اسکیمیں تجویز کی ہیں جن میں سے کئی تجاویز مقامی سطح پر دی گئی ہیں۔

اس پر مراد علی شاہ نے متعلقہ محکموں کو ہدایت کی کہ وہ نئی تجاویز کو شارٹ لسٹ کر کے آئندہ اجلاس میں پیش کریں۔انہوں نے کہا کہ فنڈنگ پر الگ اجلاس میں غور کیا جائے گا اور نئی اسکیموں کو اسی بنیاد پر حتمی شکل دی جائے گی۔ انہوں نے مزید بتایا کہ مالی سال 2023-24 کے دوران سندھ حکومت نے 1,937 نئی ترقیاتی اسکیمیں شروع کیں جن کی مالیت 88.3 ارب روپے تھی۔ ان میں سے زیادہ تر اسکیمیں اب مکمل ہوں گی۔وزیراعلی نے اختتام پر کہا کہ صوبائی آمدنی کے اعداد و شمار جون کے پہلے ہفتے میں واضح ہو جائیں گے اور بجٹ کی تجاویز اسی بنیاد پر حتمی کی جائیں گی۔