معراج خان ہمایوں کا صوابی کیلئے نئی قیادت کی ضرورت پر زور

صوابی (اُردو پوائنٹ اخبارتازہ ترین - این این آئی۔ 28 مئی2025ء)سابق صوبائی وزیر معراج ہمایون خان نے صوابی کیلئے نئی قیادت پر زور دیتے ہوئے کہا ہے کہ صوابی جو بہادری، ثقافت اور قدیم دانش کا گہوارہ ہے، اس سے کہیں بہتر کا حق دار ہے جو اسے قیادت کے نام پر دیا جا رہا ہے۔ سوشل میڈیا پر جاری اپنے بیان میں انہوں نے کہا کہ پشاور کے ساتھ ساتھ یہ خیبر پختونخوا کا وہ ضلع ہے جو سب سے زیادہ ترقی کی صلاحیت رکھتا ہے، مگر بدقسمتی سے سب سے زیادہ نظرانداز بھی کیا گیا ہے۔

یہ زمین جو قدرتی دولت اور تاریخی ورثے سے مالا مال ہے، ابھی تک پرانے نظاموں اور خود غرض افراد کے قبضے میں ہے، جو عوامی خدمت کو ذاتی مفاد کا ذریعہ سمجھتے ہیں۔صوابی کے لوگ محنتی، باوقار اور پرامن ہیں، مگر ان کی تقدیر ایسے رہنماں کے ہاتھوں میں ہے جنہیں نہ وژن ہے، نہ فہم، نہ درد۔

(جاری ہے)

نتیجہ یہ ہے کہ ایک زرخیز اورحسین ضلع غربت،پسماندگی اور بوسیدہ ڈھانچوں کا شکار ہے۔

سڑکیں ٹوٹی ہوئی، بجلی کا نظام تباہ، گیس کی سہولت ناپید، اور عوامی ٹرانسپورٹ صرف ایک خواب۔ اسکول خستہ حال، ہسپتال ناکافی، اور تفریحی مقامات مفقود،صوابی ایک عام ضلع نہیں۔ یہاں تربیلا جیسے دنیا کے سب سے بڑے بند کی آغوش ہے۔ یہاں کے پہاڑ ماربل اور چونے کے ذخائر سے بھرے ہوئے ہیں۔ یہاں کے باغات پھلوں سے لدے ہیں، اور اس کی زمین خوشحال مستقبل کے لیے تیار ہے۔

یہ وہی سرزمین ہے جس نے بدھ کو خوش آمدید کہا، سکندر اعظم کے قدموں کی چاپ سنی، اور خان عبدالغفار خان جیسے عظیم پختون مصلح کو گلے لگایا۔ مگر آج کی قیادت میں ایسا کون ہے جو ان ورثوں کو ترقی کا ذریعہ بنائی جو لوگ اس وقت اقتدار میں ہیں، ان کی دلچسپی صرف ذاتی کاروبار اور اقتدار کے تسلسل میں ہے۔ وہ کمزور اور غذائی قلت کے شکار چہروں کو نہیں دیکھتے، نہ وہ ان بچوں کو محسوس کرتے ہیں جو اسکول کی بجائے سڑکوں پر محنت کر رہے ہیں۔

کسانوں کی پریشانی، مزدور کی فاقہ کشی، نوجوان کی بے روزگاری، ان سب پر ان کی خاموشی گواہی دیتی ہے۔صوابی کو نئی قیادت کی ضرورت ہے۔ ایسی قیادت جو تعلیم یافتہ ، باشعور ، اور عوامی خدمت کو مشن سمجھے ہو،ہمیں ایک نئے سیاسی نظام کی ضرورت ہے جو شخصیت پرستی سے نکل کر وژن اور خدمت کو ترجیح دے۔یہ عوام کے لیے ایک پکار ہی: اٹھو، منظم ہو جا، اور اپنے حق کی قیادت کا مطالبہ کرو۔اور حکومت وقت کو ہم کہتے ہیں کہ اب کی خاموشی گراں ہوگی۔ ہم نمائندگی، سرمایہ کاری اور انصاف چاہتے ہیں۔صوابی اب اور انتظار نہیں کرے گا، وقت آگیا ہے۔