Live Updates

بجٹ 10جون کو ہی پیش کیا جائیگا، عیدالاضحی کی چھٹیوں کا فیصلہ وزیراعظم کی وطن واپسی پر ہوگا، سیکرٹری خزانہ

وفاقی بجٹ پیش کرنے کی تاریخ میں کوئی تبدیلی نہیں ہوئی، قومی اقصادی کونسل کے اجلاس کی تاریخ میں ردوبدل کیا جا سکتا ہے، اے پی سی سی کے اجلاس کی تاریخ کا تعین ابھی تک نہیں کیا گیا، امداد اللہ بوسال کی میڈیا سے گفتگو

فیصل علوی جمعرات 29 مئی 2025 17:20

بجٹ 10جون کو ہی پیش کیا جائیگا، عیدالاضحی کی چھٹیوں کا فیصلہ وزیراعظم ..

اسلام آباد(اردوپوائنٹ اخبار تازہ ترین۔29 مئی 2025)وفاقی سیکرٹری خزانہ امداد اللہ بوسال کا کہنا ہے کہ بجٹ 10جون کو ہی پیش کیا جائیگا، عیدالاضحی کی چھٹیوں کا فیصلہ وزیراعظم شہباز شریف کی وطن واپسی پر ہوگا، قومی اقصادی کونسل کے اجلاس کی تاریخ میں ردوبدل کیا جا سکتا ہے، اے پی سی سی کے اجلاس کی تاریخ کا تعین ابھی تک نہیں کیا گیا، سیکریٹری خزانہ نے قومی اسمبلی کی قائمہ کمیٹی خزانہ کے باہر صحافیوں کے سوال کا جواب دیتے ہوئے کہاکہ وفاقی بجٹ دس جون کو ہی پیش ہوگا۔

وفاقی بجٹ پیش کرنے کی تاریخ میں کوئی تبدیلی نہیں ہوئی۔ان کا یہ بھی کہنا تھا کہ نئے مالی سال کے بجٹ اہداف اور ممکنہ اقدامات پر تبادلہ خیال کیا جائے گا۔ نئے مالی سال کے بجٹ کو آئی ایم ایف کی مشاورت سے حتمی شکل دی جارہی ہے۔

(جاری ہے)

قبل ازیں یہ اطلاعات سامنے آئیں تھیں کہ وفاقی حکومت کی جانب سے آئندہ مالی سال 26-2025 کے بجٹ کی تاریخ میں ایک بار پھر تبدیلی پر غور کیا جا رہا ہے۔

ذرائع کے مطابق وفاقی بجٹ اب 10 جون کے بجائے 12 یا 13 جون کو پارلیمنٹ میں پیش کئے جانے کا امکان ہے۔میڈیا رپورٹس میں بتایا گیا تھا کہ عید کی وجہ سے 7 اور 8 جون کو عام تعطیل ہوں گی جبکہ عید کے تیسرے دن 9 جون کو ورکنگ ڈے کا اعلان کرنا پڑے گا۔عید کے تیسرے دن 9 جون کو قومی اقتصادی کونسل اور اکنامک سروے جاری کرنے کا شیڈول ہے۔وزارت خزانہ کے حکام کا کہنا ہے کہ ایک ہی روز میں قومی اقتصادی کونسل اجلاس کا انعقاد اور اکنامک سروے کا اجرا ممکن نہیں ہوگا۔

روایتی طور پر قومی اقتصادی کونسل کے اجلاس اور بجٹ کے درمیان دو دن کا وقفہ رکھا جاتا ہے تاکہ ترقیاتی منصوبوں کو حتمی شکل دینے کے بعد بجٹ میں شامل کیا جا سکے۔وزارتِ خزانہ کے ذرائع کے مطابق ایک ہی دن این ای سی اور اکنامک سروے جاری کرنا ممکن نہیں ہو گا۔این ای سی کے اجلاس میں چاروں صوبوں اور گلگت بلتستان کے وزرائے اعلیٰ شریک ہوں گے۔ قومی اقتصادی کونسل کے اجلاس میں آزادکشمیر کے وزیر اعظم شریک ہوں گے۔

واضح رہے کہ اس سے قبل وفاقی حکومت نے مالی سال 2025-26 کے بجٹ کی پیش کش کی تاریخ تبدیل کرتے ہوئے 2 جون کی بجائے 10 جون کا اعلان کیاتھا۔ وزارت خزانہ کے ترجمان کے مطابق یہ تبدیلی بجٹ کی مکمل تیاری اور جامع جائزے کیلئے کی گئی ہے تاکہ تمام مالی امور کو بہتر طریقے سے حتمی شکل دی جا سکے۔