صحت مند زندگی کیلئے نظام انہضام کا صحت مند ہونا بہت ضروری ہے، ماہرین صحت کی عالمی یوم ہاضمہ کے موقع پر پریس کانفرنس

جمعرات 29 مئی 2025 20:20

اسلام آباد (اُردو پوائنٹ اخبارتازہ ترین - اے پی پی۔ 29 مئی2025ء) ماہرین صحت نے کہا ہےکہ دنیا میں ہر 3 میں سے 1 شخص ہاضمے کے مختلف مسائل جیسے سینے کی جلن ، تیزابیت، بد ہضمی اور قبض جیسی بیماریوں کا شکار ہے،ان مسائل کو بڑھاوا دینے میں انسانی طرز زندگی اور دیگر بیماریوں کا عمل دخل ہے، ہاضمہ کے مسائل کی وجوہات میں غیرصحت بخش غذائیں ،زیادہ چکنائی والا کھانا، کم پانی پینا اور طرز زندگی میں بے ترتیبی شامل ہے جبکہ اس کے علاوہ ذہنی دبائو، تمباکو نوشی اور الکوحل کا استعمال بھی ان مسائل کو بڑھا سکتا ہے۔

ان خیالات کا اظہار ڈاکٹر سلطان زیب، ڈاکٹر سرور ملک اور ڈاکٹر طیب سعید نے جمعرات کو سرل کمپنی کے زیر ہتمام عالمی یوم ہاضمہ کے موقع پر نیشنل پریس کلب اسلام آباد میں پریس کانفرنس کرتے ہوئے کیا۔

(جاری ہے)

ماہرین صحت نے کہا کہ صحت مند زندگی کیلئے نظام انہضام کا صحت مند ہونا بہت ضروری ہے، ہاضمہ کے مسائل کی وجوہات میں غیر متوازن غذا، دیر سے کھانا، زیادہ کھانا ، زیادہ دیر تک بیٹھے رہنا اور ورزش یا چہل قدمی نہ کرنا شامل ہیں۔

تقریباً 100 میں سے چالیس فیصد لوگ ادویات کے استعمال کے باوجود تیزابیت کا شکار رہتے ہیں۔ ماہرین صحت نے اس حوالے سے عوامی آگاہی پر زور دیتے ہوئے کہا کہ صحت ہاضمہ کی بہتری اور اس کے مسائل سے بچنےکیلئے متوازن اور غذائیت سے بھرپور غذاکا استعمال ، پانی کا مناسب مقدارمیں پینا، باقاعدگی سے ورزش کرنا نہایت ضروری ہے، کم اور اچھا کھانا وقت پر کھائیں، سبزیوں اور پھلوں کا استعمال اور چھ سے آٹھ گھنٹے کی نیند لیکر ان مسائل سے بچا جا سکتا ہے جبکہ بچوں کو متوازن غذائوں کے ذریعے اس بیماری سے دور رکھا جا سکتا ہے۔ماہرین صحت نے عوام سے کہا کہ وہ اپنی زندگی میں مثبت تبدیلیاں لا کر ہاضمہ کی صحت کو بہتر بنا سکتے ہیں۔