Live Updates

پاکستان اور بنگلہ دیش کے درمیان عوامی سطح پررابطے بڑھانے کی ضرورت ہے‘ گورنرپنجاب

جمعہ 30 مئی 2025 23:01

لاہور (اُردو پوائنٹ اخبارتازہ ترین - این این آئی۔ 30 مئی2025ء)گورنر پنجاب سردار سلیم حیدر خان سے یہاں گورنر ہائوس لاہور میں بنگلہ دیش کے ہائی کمشنر محمد اقبال حسین نے ملاقات کی ۔ملاقات میں دونوں ممالک کے درمیان تعلیم، تجارت اورزراعت سمیت مختلف شعبوں میں تعاون کو فروغ دینے پر تبادلہ خیال کیا گیا۔اس موقع پر گفتگو کرتے ہوئے گورنر پنجاب سردار سلیم حیدر خان نے کہا کہ بنگلہ دیش اور پاکستان برادر اسلامی ممالک ہیں جن میں تاریخ، مذہب اور ثقافت سمیت کئی قدریں مشترک ہیں۔

انہوں نے کہا کہ پاکستانی عوام بنگلہ دیشی بہن بھائیوں سے محبت کرتے ہیں۔دونوں ممالک کے درمیان عوامی سطح پر رابطے بڑھانے کی ضرورت ہے۔ انہوں نے اس امید کا اظہار کیا کہ بنگلہ دیش کی موجودہ حکومت میں دونوں ممالک کے درمیان تعلقات میں نئی تاریخ رقم ہو گی۔

(جاری ہے)

گورنر پنجاب نے کہا کہ پاکستان میں کڈنی لیور ٹراسپلانٹ کے کامیاب آپریشن ہو رہے ہیں۔

انہوں نے کہا کہ صحت اور تعلیم کے شعبے میں عوامی سطح پر روابط بڑھانے کی ضرورت ہے۔ گورنر پنجاب نے کہا کہ بنگلہ دیشی طلبا پاکستان میں میڈیکل اور انجینئرنگ کے شعبے میں اعلی تعلیم حاصل کر سکتے ہیں۔ انہوں نے کہا کہ دونوں ممالک کا طلبا کے لئے سکالرشپ پروگرام کے تحت اعلی تعلیم کے دروازے کھولنے کا اقدام خوش آئند ہے۔ گورنر پنجاب نے کہا کہ پنجاب حکومت بھی بنگلہ دیشی طلبا کو سکالرشپس دینے پر غور کر سکتی ہے۔

انہوں نے مزید کہا کہ پاکستان اور بنگلہ دیش مختلف شعبوں میں امپورٹ ایکسپورٹ بڑھا کر تجارتی تعلقات کو نئی وسعتوں تک لے جا سکتے ہیں۔گورنر پنجاب نے کہا کہ بنگلا دیش پاکستان سے کوئلہ، فشنگ کے شعبے میں ایکسپورٹ کے مواقع ڈھونڈ سکتا ہے۔ بنگلہ دیش کے ہائی کمشنر محمد اقبال حسین نے کہا کہ پاکستان اور بنگلہ دیش کے درمیان سپورٹس اور ثقافت کے شعبے میں تعلقات کو وسعت دینے کے وسیع امکانات ہیں۔ انہوں نے کہا کہ بنگلہ دیش پاکستان کے ساتھ مختلف شعبوں میں روابط مضبوط کرنے کے لیے پرعزم ہے۔