پنجاب پولیس راجن پور اور رحیم یار خان کی کچہ کریمنلز کے خلاف انٹیلی جنس بیسڈ کارروائیاں

جمعرات 29 مئی 2025 23:50

لاہور (اُردو پوائنٹ اخبارتازہ ترین - اے پی پی۔ 29 مئی2025ء) پنجاب پولیس کی کچہ کریمنلز کے خلاف کارروائیاں جاری ہیں جس کے تسلسل میں راجن پور اور رحیم یار خان پولیس نے کچہ کریمنلز کے خلاف انٹیلی جنس بیسڈدو مختلف کامیاب کاروائیاں کرتے ہوئے ہنی ٹریپ کے ذریعے اغوا ہونے والے 2 مغوی شہریوں اور3سالہ بچے کو بحفاظت بازیاب کروا لیا۔ ترجمان پنجاب پولیس نے تفصیلات بتاتے ہوئے کہا کہ پنجاب پولیس راجن پورنے کچہ کریمنلز کے خلاف انٹیلی جنس بیسڈ کارروائی کرتے ہوئے تھانہ شاہوالی کے علاقہ سے چند روز قبل ہنی ٹریپ کے ذریعے اغوا ہونے والے 2مغوی شہریوں برکت علی اور ساجد حسین کو بازیاب کروا لیا۔

یاد رہے شہریوں کے اغوا کا مقدمہ راجن پور پولیس کی جانب سے کچہ کریمنلز کیخلاف تھانہ شاہوالی میں درج کیا گیا تھا۔

(جاری ہے)

شاہوالی پولیس نے کچہ ایریا کے اغوا کاروں کے ٹھکانوں پر ریڈ کیا۔راجن پور پولیس اور کچہ کریمنلز کے مابین شدید فائرنگ کا تبادلہ ہوا جس کے نتیجے میں کچہ کریمنلز مغویوں کو چھوڑ کر بھاگنے پر مجبور ہو گئے۔ اسی طرح پنجاب پولیس رحیم یار خان نے ڈی پی او عرفان علی سموں کی قیادت میں کچہ کریمنلز کے خلاف کامیاب کارروائی کرتے ہوئے انٹیلی جنس بیسڈ ٹارگٹڈ آپریشن کیا۔

پولیس نے 3سالہ مغوی بچے زین کو بحفاظت بازیاب کروانے کیلئے ریڈ کیا تو کچہ کریمینلزنے پولیس پر فائرنگ کر دی، فائرنگ کے تبادلے میں ملزمان پسپائی اختیار کرتے ہوئے فرار ہوگئے۔ ڈی پی اورحیم یار خان عرفان علی سموں، اے ایس پی انعام اللہ اور پولیس بازیابی کے بعد تین سالہ زین کو لے کر اس کے گھر پہنچ گئے۔ترجمان پنجاب پولیس نے بتایا تینوں مغویوں کو بحفاظت بازیاب کروانے کے بعد ان کے ورثا کے حوالے کر دیا گیاہے۔

ورثا اور اہل علاقہ نے پولیس کو دعائیں دی اورپنجاب پولیس زندہ باد کے نعرے لگائے۔ڈی پی او راجن پور فاروق امجداور ڈی پی او رحیم یار خان عرفان علی سموں نے کہا کہ ملزمان کو جلد گرفتار کر کے کیفر کردار تک پہنچائیں گے۔آئی جی پنجاب نے دو مغوی شہریو ں اور کمسن بچے کی بازیابی پر ڈی پی او راجن پور،رحیم یار خان اور ان کی ٹیموں کو شاباش دی۔