سعودی وزیرِ داخلہ کا جدہ حج ٹرمنل کا دورہ، مکہ روٹ منصوبے پر عملدرآمد کا جائزہ لیا

جمعہ 30 مئی 2025 10:50

ریاض (اُردو پوائنٹ اخبارتازہ ترین - اے پی پی۔ 30 مئی2025ء) سعودی عرب کے وزیرِ داخلہ اور اعلی حج کمیٹی کے سربراہ شہزادہ عبدالعزیز بن سعود بن نایف نے جدہ حج ٹرمنل کا دورہ کیا اور عازمین کو فراہم کی جانے والی خدمات کا جائزہ لیا۔ اردو نیوز کے مطابق شاہ عبدالعزیز انٹرنیشنل ایئرپورٹ پر وزیر داخلہ کے ہمراہ نائب گورنر مکہ مکرمہ شہزادہ سعود بن مشعل بن عبدالعزیز و دیگر اعلی حکام بھی موجود تھے۔

وزیر داخلہ اور وفد کو ’’مکہ روٹ ‘‘ پروگرام کے تحت آنے والے عازمین کو فراہم کی جانے والی خدمات کے بارے مطلع کیا گیا۔

(جاری ہے)

مکہ روٹ انیشی ایٹو کے ذریعے آنے والے عازمین کے امیگریشن کی کارروائی ان کے ممالک میں ہی کرلی جاتی ہے جس سے انہیں یہ سہولت ہوتی ہے کہ مملکت پہنچنے کے فوری بعد انہیں ہوائی اڈے سے مکہ مکرمہ یا مدینہ منورہ میں ان کی رہائش گاہوں پرپہنچا دیا جاتا ہے ۔

مکہ روٹ منصوبہ سعودی وژن 2030 کے اہم پروگراموں میں سے ایک ہے جس کا مقصد عازمین حج کو ہرممکن سہولت فراہم کرنا اور ان کا سفرحج مثالی بنانا ہے۔ منصوبے کا آغاز تجرباتی طورپر 2017 میں ملائیشیا سے کیا گیا تھا جس کی کامیابی کے بعد دوسرےسال اس پروگرام کے دائرہ کار میں توسیع کرتے ہوئے انڈونیشیا کو بھی شامل کیا گیا ۔