سیالکوٹ پولیس نے ضمنی الیکشن PP-52 کے لیے جامع سکیورٹی پلان تیار کر لیا

جمعہ 30 مئی 2025 20:10

سیالکوٹ (اُردو پوائنٹ اخبارتازہ ترین - اے پی پی۔ 30 مئی2025ء) سیالکوٹ پولیس نے ضمنی الیکشن PP-52 کے لیے جامع سکیورٹی پلان تیار کر لیا ہے، الیکشن کے شفاف اور پر امن ا نعقاد کو یقینی بنانے کیلئے 185 پولنگ سٹیشنز پر 2091 اہلکار فرائض سر انجام دیں گے۔ترجمان سیالکوٹ پولیس کے مطابق ڈی پی او سیالکوٹ فیصل شہزاد کی قیادت میں سیالکوٹ پولیس پرامن، شفاف اور منصفانہ انتخابات کے انعقاد کو یقینی بنانے کے لیے مکمل طور پر پُرعزم ہے،اس مقصد کیلئے سیالکوٹ پولیس نے صوبائی اسمبلی کے حلقہ پی پی 52 میں یکم جون 2025 کو ہونے والے ضمنی الیکشن کے سلسلہ میں جامع، موثر اور فول پروف سکیورٹی پلان ترتیب دے دیا ہے۔

ضمنی الیکشن کے دوران حلقے میں مجموعی طور پر 185 پولنگ سٹیشنز قائم کیے گئے ہیں، جنہیں حساسیت کے اعتبار سے تین کیٹیگریز میں تقسیم کیا گیا ہے۔

(جاری ہے)

کیٹیگری A میں 11 پولنگ سٹیشنز کو انتہائی حساس ، 38 پولنگ سٹیشنز کیٹیگری B میں حساس جبکہ 136 پولنگ سٹیشنز کو C کیٹگری یعنی نارمل قرار دیا گیا ہے ۔انتخابات کے دوران امن و امان قائم رکھنے، بیلٹ پیپرز کی ترسیل اور نتائج کے اعلان تک سکیورٹی کو یقینی بنانے کے لیے 2091 پولیس افسران و اہلکارتعینات کیے جائیں گے۔

یہ اہلکار پولنگ سٹیشنز، حساس مقامات اور الیکشن کے دیگر مراحل پر اپنے فرائض سرانجام دیں گے۔ڈی پی او سیالکوٹ فیصل شہزاد نے سکیورٹی ڈیوٹی پر مامور تمام سکیورٹی اہلکاروں کو سختی سے تاکید کی ہے کہ وہ اپنی ڈیوٹی مکمل غیرجانبداری اور قانون کے مطابق انجام دیں،سیالکوٹ پولیس اس بات کو یقینی بنائے گی کہ ووٹرز کو ایک پرامن، محفوظ اور سازگار ماحول میں اپنا حق رائے دہی استعمال کرنے کا موقع فراہم ہوسکے۔