عید الاضحیٰ،محکمہ داخلہ پنجاب کے صوبہ بھر میں دفعہ 144 کے احکامات جاری

ہفتہ 31 مئی 2025 16:00

لاہور (اُردو پوائنٹ اخبارتازہ ترین - اے پی پی۔ 31 مئی2025ء) محکمہ داخلہ پنجاب نے عید الاضحیٰ کی آمد کے پیشِ نظرصوبہ بھر میں دفعہ 144 کے نفاذ کی ہدایات جاری کر دیں ۔ سیکرٹری داخلہ پنجاب نے عوام کے جان و مال کے تحفظ اور ماحولیاتی بہتری کو مدِ نظر رکھتے ہوئے صوبہ بھر میں عوامی مقامات پر سری پائے جلانے، جانوروں کے فضلے اور اوجھڑیوں کو مین ہولز، نالیوں اور نہروں میں پھینکنے پر دفعہ 144 نافذ کر دی ہے۔

اسی طرح منظور شدہ مقامات کے علاوہ کسی بھی جگہ قربانی کے جانوروں کی خرید و فروخت پر دفعہ 144 کے نفاذ کا حکم جاری کیا گیا ہے۔ محکمہ داخلہ پنجاب نے دریائوں، نہروں، ڈیمز اور جھیلوں میں نہانے، تیراکی اور کشتی رانی پر بھی دفعہ 144 کا نفاذ کیا ہے جبکہ اسلحہ اور گولہ بارود کی نمائش پر بھی مکمل پابندی ہوگی۔

(جاری ہے)

پنجاب بھر میں دفعہ 144 کے تحت پابندیوں کا اطلاق 5 تا11 جون تک ہو گا۔

سیکرٹری داخلہ پنجاب نے ضابطہ فوجداری کے تحت پابندیوں کا حکم دیا ہے۔ ترجمان محکمہ داخلہ کے مطابق پابندیوں کا فیصلہ انسانی جانوں کے تحفظ، امن و امان کے قیام اور ماحول کی بہتری کےلئے کیا گیا۔ ترجمان نے کہا کہ مذکورہ سرگرمیاں نہ صرف عوامی تحفظ اور صحتِ عامہ کےلئے خطرہ ہیں بلکہ لوگوں میں اضطراب کا باعث بھی بنتی ہیں۔ ترجمان محکمہ داخلہ پنجاب نے واضح کیا کہ عیدالاضحیٰ پر کسی کالعدم تنظیم کو قربانی کی کھالیں اکٹھی کرنے کی اجازت نہیں ہو گی۔

صرف پنجاب چیریٹی کمیشن سے رجسٹرڈ ادارے ہی قربانی کی کھالیں وصول کر سکیں گے۔ محکمہ داخلہ پنجاب نے انتظامیہ اور قانون نافذ کرنے والے اداروں کو ہدایت کی ہے کہ دفعہ 144 کے تحت جاری کیے گئے احکامات پر من و عن عملدرآمد یقینی بنایا جائے۔