قربانی کے جانوروں کی آلائشوں کیلئے 15لاکھ ماحول دوست بیگ تیار

لاہور میں 300صفائی ماڈل کیمپس، 104عارضی کلیکشن پوائںٹس قائم کئے جائیں گے

ہفتہ 31 مئی 2025 16:15

لاہور (اُردو پوائنٹ اخبارتازہ ترین - این این آئی۔ 31 مئی2025ء) عیدالاضحی پر صفائی کی بڑی تیاری، لاہور ویسٹ مینجمنٹ کمپنی نے زیرو ویسٹ ہدف مقرر کرتے ہوئے گرینڈ صفائی انتظامات کو حتمی شکل دیدی۔لاہور ویسٹ مینجمنٹ کمپنی نے عیدالاضحی پر شہر کو زیرو ویسٹ کرنے کا پلان بنالیا۔ آلائشیں ٹھکانے لگانے کے لئے 15لاکھ بایو ڈی گریڈ ایبل بیگز تیار کرلیے، بیگ 300کیمپس کے ذریعے شہریوں میں تقسیم کیے جائیں گے۔

(جاری ہے)

عید پر آلائشیں اکٹھی کرنے کے لئے 104عارضی کلیکشن پوائنٹس قائم ہوں گے، صفائی آپریشن کامیاب بنانے کے لئے افسران سمیت ہزار ملازمین کی چھٹیاں منسوخ کردی گئیں۔سی ای او ایل ڈبلیو ایم سی بابر صاحب دین کا کہنا کہ صفائی یقینی بنانے کیلئے کنٹرول روم فعال رہے گا جبکہ سیف سٹی کیمروں اور ڈرون سے بھی مانیٹرنگ ہوگی۔دوسری جانب محکمہ داخلہ پنجاب نے دفعہ 144عائد کرتے ہوئے ماحول کے تحفظ کے لئے عوامی مقامات پر سری پائے بھوننے جبکہ قربانی کے جانوروں کی آلائشیں ندی نالوں، مین ہولز اور نہر میں پھینکنے پر پابندی عائد کردی جبکہ امن و امان کی صورتحال قابو میں رکھنے کیلئے کالعدم تنظیموں کے کھالیں جمع کرنے پر بھی پابندی عائد کردی گئی ہے۔