مولانا جس کرپشن کی بات کر رہے یہ اس وقت حکومت کا حصہ تھے، انکے لوگوں سے ہی 20 ارب ریکور کیے، بیرسٹر سیف

پیپلز پارٹی، جے یو آئی اور باقی تانگہ پارٹیاں ضرور تحریک چلائیں، شوق سے تحریک چلائیں، ایسے ہتھکنڈوں سے بانی پی ٹی آئی کی مقبولیت ختم نہیں ہو گی، مشیر اطلاعات کے پی

اتوار 1 جون 2025 16:40

پشاور(اُردو پوائنٹ اخبارتازہ ترین - این این آئی۔ 01 جون2025ء) مشیر اطلاعات خیبرپختونخوا بیرسٹر محمد علی سیف نے کہا ہے کہ مولانا فضل الرحمان جس کرپشن کی بات کر رہے ہیں اس وقت یہ خود نگران حکومت کا حصہ تھے اور ہم نے 20 ارب روپے ان ہی کے لوگوں سے ریکور کیے ہیں۔ایک تقریب سے خطاب کرتے ہوئے بیرسٹر سیف نے کہاکہ ہمارے اخلاق اور کردار سے ہماری پہچان ہوتی ہے، سکھ مذہب میں تعلیمات انسانیت سے محبت اور اخلاق کا درس ملتا ہے، ہندو مذہب میں بھی اخلاق پر سب سے زیادہ زور دیا گیا ہے، حضرت عیسیٰ علیہ سلام کی تعلیمات سوائے محبت کے کسی پر زور نہیں دیتیں، اسلام کی تعلیمات کا نچوڑ ہی محبت، اخلاق اور بھائی چارہ ہے۔

بیرسٹر محمد علی سیف نے کہاکہ نوجوان اپنی صلاحیتیں انسانیت کی خدمت کے لیے وقف کریں، اخلاق کی بنا پر ہم سب ایک ہیں، کوئی اقلیت و اکثریت نہیں ہے، ہم سب میں بہتر وہ ہے جو انسانیت کے لیے کچھ کرے۔

(جاری ہے)

بعد ازاں میڈیا سے گفتگو کرتے ہوئے مشیر اطلاعات بیرسٹر محمد علی سیف نے کہاکہ پیپلز پارٹی، جے یو آئی اور باقی تانگہ پارٹیاں ضرور تحریک چلائیں، شوق سے تحریک چلائیں لیکن عوام کو ساتھ لیکر آئیں، ایسے ہتھکنڈوں سے بانی پی ٹی آئی کی مقبولیت ختم نہیں ہو گی۔

انہوںنے کہاکہ ہم تحریک بھی چلائیں گے، عوام کو شعور بھی دیں گے، عوام کو شعور دیں گے کہ حقیقی آزادی سے ان کو کوئی نہیں روک سکتا۔ایک سوال کے جواب میں بیرسٹر سیف نے کہا کہ دو دن پہلے ہمارے چترال کے ایم این اے کو سزا دی گئی، اپنا زور آزماؤ، عوام ہمارے ساتھ ہیں، بانی پی ٹی آئی ہمیشہ سے تحریک کے قائد رہے ہیں، میں نہیں سمجھتا پارٹی قیادت ناکام ہوئی ہے۔

مشیر اطلاعات نے کہاکہ مولانا جس کرپشن اسکینڈل کی بات کرتے ہیں اس وقت یہ خود نگران حکومت کا حصہ تھے، مولانا کے لوگ ٹھیکے اور کمیشن لیکر تجوریاں بھر رہے تھے، ہم نے 20 ارب کے قریب چوری شدہ رقم آپ ہی کے لوگوں سے وصول کی ہے۔انہوںنے کہاکہ خیبر پختونخوا کا بجٹ 13 جون کو پیش کیا جائے گا، صوبائی بجٹ میں عوام کو بھرپور ریلیف ملے گا، ہمارا خزانہ بھرا ہوا ہے، ہم نے صوبے کے وسائل جائز طریقے سے لاہور بار کو دیے، لاہور بار کے وکلا کی جمہوریت کے لیے بہت قربانیاں ہیں۔