Live Updates

ہم نے چوری شدہ 20ارب جے یو آئی کے لوگوں سے وصول کیے،بیرسٹر سیف

ہم تحریک چلائیں گے، عوام کو شعور بھی دیں گے کہ حقیقی آزادی سے انہیں کوئی نہیں روک سکتا،میڈیاسے گفتگو

اتوار 1 جون 2025 19:40

پشاور(اُردو پوائنٹ اخبارتازہ ترین - این این آئی۔ 01 جون2025ء)ترجمان خیبر پختونخوا حکومت بیرسٹر سیف نے انکشاف کیا ہے کہ ہم نے 20ارب کی چوری شدہ رقم جے یو آئی کے لوگوں سے وصول کی۔میڈیا سے گفتگو میں بیرسٹر سیف نے کہا کہ سربراہ جے یوآئی جس کرپشن سکینڈل کی بات کرتے ہیں، اس وقت یہ خود نگراں حکومت کا حصہ تھے۔

(جاری ہے)

انہوں نے کہا کہ جے یوآئی کے لوگ ٹھیکے اور کمیشن لے کر تجوریاں بھر رہے تھے، 20ارب کے لگ بھگ چوری شدہ رقم آپ ہی کے لوگوں سے وصول کی۔

ترجمان خیبر پختونخوا حکومت نے کہا کہ جے یو آئی، پیپلز پارٹی اور دیگر تانگہ پارٹیاں ضرور تحریک چلائیں لیکن عوام کو ساتھ لے کر آئیں۔انہوںنے کہاکہ ایسے ہتھکنڈوں سے بانی پی ٹی آئی کی مقبولیت کم نہیں ہو گی، خزانہ بھرا ہوا ہے، صوبائی بجٹ میں عوام کو بھرپور ریلیف ملے گا۔بیرسٹر سیف نے کہا کہ ہم تحریک بھی چلائیں گے، عوام کو شعور بھی دیں گے کہ حقیقی آزادی سے انہیں کوئی نہیں روک سکتا۔