ڈیرہ غازی خان میں خوارج کے خلاف کامیاب کارروائی، 4 دہشت گرد ہلاک

پولیس کو پنجاب و خیبر پختونخواہ کے سرحدی علاقے میں خوارجی دہشتگردوں کی نقل و حرکت کی اطلاع ملی، دہشتگرد مختلف مقامات پر شہریوں کو خوف و ہراس میں مبتلا کر رہے تھے؛ ترجمان پنجاب پولیس

ساجد علی اتوار 1 جون 2025 21:36

ڈیرہ غازی خان میں خوارج کے خلاف کامیاب کارروائی، 4 دہشت گرد ہلاک

ڈیرہ غازی خان ( اُردو پوائنٹ اخبارتازہ ترین۔ 01 جون 2025ء ) صوبہ پنجاب کے علاقہ ڈیرہ غازی خان میں خوارج کے خلاف کامیاب کارروائی کے دوران 4 دہشت گرد ہلاک ہوگئے۔ ترجمان پنجاب پولیس کے مطابق ڈیرہ غازی خان پولیس نے کوٹ مبارک کے علاقے میں مقابلے کے دوران 4 دہشت گرد ہلاک ہوگئے جن سے اسلحہ برآمد کرنے کے بعد سرچ آپریشن شروع کردیا گیا، پولیس کو پنجاب اور خیبر پختونخواہ کے سرحدی علاقے کوٹ مبارک میں خوارجی دہشت گردوں کی نقل و حرکت کی اطلاع ملی، خوارجی دہشت گرد مختلف مقامات پر شہریوں کو خوف و ہراس میں مبتلا کر رہے تھے۔

ترجمان پنجاب پولیس نے بتایا کہ اطلاع ملتے ہی پولیس ٹیموں نے فوری پیش قدمی کی، علاقے کا محاصرہ کرکے آپریشن کا آغاز کیا گیا، خوارجی دہشت گرد بھاری اسلحہ کے ساتھ پولیس ٹیموں پر حملہ آور ہوئے، پنجاب پولیس نے بروقت مؤثر کارروائی کرتے ہوئے دہشت گردوں کے مذموم عزائم کو خاک میں ملا دیا، پولیس کی بھرپور کارروائی میں 4 خوارجی دہشت گرد ہلاک کر دیئے گئے، دیگر دہشت گرد جھاڑیوں، ٹیلوں کی آڑ میں فرار ہونے میں کامیاب ہوگئے۔

(جاری ہے)

ترجمان پنجاب پولیس کا کہنا ہے کہ پولیس نے ہلاک دہشت گردوں کے قبضے سے اسلحہ، گولہ بارود بھی برآمد کیا، پولیس آپریشن کے بعد علاقے میں سرچ اینڈ سویپ آپریشن جاری ہے، دیگر شرپسند عناصر بھی جلد از جلد انجام تک پہنچانے کا عزم ہے، آر پی او ڈیرہ غازی خان کیپٹن (ر) سجاد حسن خان کی نگرانی، ڈی پی او سید علی کی قیادت میں پنجاب پولیس کی ٹیمیں مسلسل فیلڈ میں موجود رہیں، آئی جی پنجاب ڈاکٹر عثمان انور کی چار خوارجی دہشت گردوں کو ہلاک کرنے پر ڈیرہ غازی خان پولیس کو شاباش دی، انہوں نے کہا کہ پنجاب پولیس خوارجی دہشت گردوں کے خلاف سیسہ پلائی دیوار ہے، ملک دشمن عناصر کو کبھی ان کے ناپاک عزائم میں کامیاب نہیں ہونے دیں گے۔