Live Updates

تین ٹی 20 میچوں کی سیریز کے آخری میچ میں پاکستان نے بنگلادیش کو 7 وکٹ سے ہرا کر کلین سوئپ کردیا

پیر 2 جون 2025 01:40

لاہور (اُردو پوائنٹ اخبارتازہ ترین - اے پی پی۔ 02 جون2025ء) تین ٹی 20 میچوں کی سیریز کے آخری میچ میں پاکستان نے بنگلادیش کو 7 وکٹ سے ہرا کر کلین سوئپ کردیا۔لاہور میں کھیلےگئے میچ میں پاکستان نے ٹاس جیت کر فیلڈنگ کا فیصلہ کیا۔بنگلادیش نے پہلےکھیلتے ہوئے مقررہ 20 اوورز میں 6 وکٹوں کے نقصان پر 196 رنز بنائے۔بنگلادیش کا آغاز شاندار رہا، پرویزحسین اور تنزید حسن نے 110 رنز کی انتہائی مستحکم بنیاد رکھی۔

تنزید 42 اور پرویز 66 رنز بنا کر آؤٹ ہوئے، لیکن اس کے بعد آنے والے بیٹرز بڑا اسکور نہ بناسکے۔لٹن داس نے 22 اور توحید ہری دوئے نے 25 رنز بنائے، بنگلا دیش کا اسکور 6 وکٹ پر196 رنز رہا۔پاکستان کی جانب سے حسن علی نے 38 رنز کے عوض 2 وکٹیں حاصل کیں، عباس آفریدی نے 26 رنز دے کر دو کھلاڑیوں کو آؤٹ کیا ۔

(جاری ہے)

197 رنز کے تعاقب میں صاحبزادہ فرحان تو پہلے ہی اوور میں آؤٹ ہوگئے لیکن پھر محمد حارث نے صائم ایوب کے ساتھ رنز بڑھائے،صائم نے چار چھکے لگائے اور 29 گیندوں پر 45 رنز بنائے۔

حسن نواز نے بھی 13 گیندوں پر 26رنز بنائے۔ دوسری جانب سے محمد حارث چھکے چوکے لگاتے رہے اور رنز بڑھاتے رہے ۔ حارث نے کرئیر کی پہلی سنچری اسکور کی، وہ پاکستان کی جانب سے اوپنرز کے علاوہ ٹی ٹوئنٹی میں سنچری بنانے والے پہلے بیٹربھی بن گئے۔پاکستان نے ہدف اٹھارہویں اوور میں تین وکٹ پر پورا کردیا اور تین میچز کی سیریز میں کلین سوئپ مکمل کیا۔ محمد حارث 107 رنز اور سلمان آغا15 رنز بنا کرناٹ آؤٹ رہے۔