پبلک ٹرانسپورٹرز نے کرایہ کم نہ کرنے کی انوکھی وجہ پیش کر دی

مظفرآباد(اُردو پوائنٹ اخبارتازہ ترین - این این آئی۔ 02 جون2025ء) پبلک ٹرانسپورٹرز نے کرایہ کم نہ کرنے کی انوکھی وجہ پیش کر دی۔ پٹرولیم مصنوعات کی قیمتوں میں تو واضح کمی کی گئی مگر انجن آئل اور سپیئر پارٹس کی قیمتوں میں تو کمی نہیں ہوئی۔ موٹر سائیکلوں،رکشوں، سوزوکی گاڑیوں اور دیگر گاڑیوں کے سپیئر پارٹس،انجن آئل پہلے سے دگنی قیمت پر فروخت کیا جاتا ہے ہم کیسے کرایہ کم کریں۔

شہر اقتدار مظفرآباد کی سپیئر پارٹس کی دکانوں پر سپیر پارٹ،انجن آئل کی قیمتیں آسمان سے باتیں کرنے لگیں۔ناقص اور ایرانی آئل مہنگے کاموں فروخت کیا جانے لگا۔مظفرآباد و قرب و جوار کے علاقے ناقص اور غیر معیاری انجن آئل،دونمبر سپیئر پارٹس فروخت کرنے کے لیے کھلی منڈی کی شکل اختیار کر گیا۔

(جاری ہے)

غیر ریاستی بیوپاری غیر معیاری ناقص انجن آئل اور سپیئر پارٹس لاکھوں روپے کا ادھار دینے کی پالیسیوں پر گامزن۔

میڈیا رپورٹ کے مطابق شہر اقتدار مظفرآباد میں پبلک ٹرانسپورٹرز جن میں بائیکیا رائڈرز، رکشہ ڈرائیورز،سوزوکی ڈرائیورز و دیگر گاڑیوں کے مالکان اور ڈرائیوروں نے پٹرولیم مصنوعات کی قیمتوں میں کمی کے بعد کرایہ کم نہ کرنے کی انوکھی وجہ پیش کرتے ہوئے کہا ہے کہ پٹرول کی قیمت تو کم کر دی گئی ہے مگر سپیئر پارٹس اور انجن آئل کی قیمتوں میں تو کمی نہیں کی گئی ہم کرایہ کیسے کم کر سکتے ہیں۔

دوسری جانب میڈیا انویسٹیگیشن ٹیم کے مطابق شہر اقتدار مظفرآباد اور قرب و جوار کے علاقے ناقص غیر معیاری انجن آئل،سپئیر پارٹس فروخت کرنے کے لیے کھلی منڈی بن چکے ہیں۔ غیر ریاستی بیوپاری لاکھوں روپے کا انجن آئل اور غیر معیاری سپیر پارٹس کا سامان اس کاروبار سے منسلک لوگوں کو ادھار دے کر چلے جاتے ہیں۔ اس طرح انہیں کاروبار کرنے میں بھی آسانی ہوتی ہے اور وہ جی بھر کر لوگوں کی جیبوں کے ساتھ کھلواڑ کرتے ہیں ساتھ ہی ساتھ لاکھوں روپے مالیت کی گاڑیوں کا انجن بھی تباہ حال ہو جاتا ہے جس کی وجہ سے آئے روز لوگوں کی گاڑیاں انجن کے مسائل سے دوچار ہو کر ان آٹوز میکینک کی دکانوں کی زینت بنی رہتی ہیں۔

عوامی حلقوں نے وزیراعظم آزاد کشمیر سے استدعا کی ہے کہ سب سے پہلے وہ وزیر ٹرانسپورٹ کسی پڑھے لکھے سمجھدار شخص کو تعینات کریں تاکہ وہ ٹرانسپورٹ اتھارٹی کو بہتر طریقے سے آگے لے جانے کے لیے قانون سازی کر سکے۔ اسی طرح سیکرٹری ٹرانسپورٹ کی مبینہ ملی بھگت یا غفلت تین سے زائد مرتبہ پٹرولیم مصنوعات میں کمی کے باوجود نئے کرائے نامہ جاری نہ کیے جا سکے ہیں جو کہ ٹرانسپورٹ اتھارٹی کی کھلم کھلا نا اہلی کا منہ بولتا ثبوت ہے۔

جس کی وجہ سے معاشرے میں سیاسی عدم استحکام اور انتشار کے علاوہ لوگوں میں بے چینی پیدا ہو چکی ہے۔ لوگوں نے وزیراعظم آزاد کشمیر اور دیگر ارباب اختیار سے مطالبہ کیا ہے کہ شہر بھر میں سپیئر پارٹس کی دکانوں کا معائنہ کرنے کے لیے ایک خصوصی ٹیم تشکیل دی جائے جو سپیئرز پارٹس کی قیمتوں سمیت انجن آئل کی کوالٹی کو چیک کریں تاکہ لوگوں کی لاکھوں روپے مالیت کی گاڑیاں تباہ ہونے سے بچ سکیں۔