پاکستانی عازمین کے کھانے پر15 کروڑ 50 لاکھ روپے خرچ کیے جا رہے ،وزارت مذہبی امور

جیوں کو اوپن مارکیٹ کے مقابلے میں سستا و معیاری کھانا مہیا کیا جا رہا ،جس میں روزانہ تین وقت کا مکمل کھانا شامل ہے،ذرائع

پیر 2 جون 2025 18:52

پاکستانی عازمین کے کھانے پر15 کروڑ 50 لاکھ روپے خرچ کیے جا رہے ،وزارت ..

اسلام آباد(اُردو پوائنٹ اخبارتازہ ترین - این این آئی۔ 02 جون2025ء)رواں سال حج کے دوران پاکستانی عازمین کے کھانے پر 15 کروڑ 50 لاکھ روپے خرچ کیے جا رہے ہیں۔ وزارت مذہبی امور کے ذرائع کے مطابق، ہر عازم کو روزانہ 34 سعودی ریال مالیت کا کھانا فراہم کیا جا رہا ہے جبکہ کھانے کی مد میں فی حاجی سے 1360 ریال وصول کیے گئے ہیں۔مکہ مکرمہ میں 22 اور مدینہ منورہ میں 13 کمپنیاں پاکستانی عازمین کو کھانے کی سہولت فراہم کر رہی ہیں۔

وزارت نے بتایاکہ حاجیوں کو اوپن مارکیٹ کے مقابلے میں سستا اور معیاری کھانا مہیا کیا جا رہا ہے، جس میں روزانہ تین وقت کا مکمل کھانا شامل ہے۔سرکاری سکیم کے تحت اب تک 88 ہزار 380 پاکستانی عازمین سعودی عرب پہنچ چکے ہیں جبکہ نجی سکیم کے تحت 27 ہزار 11 عازمین نے شرکت کی ہے۔

(جاری ہے)

مجموعی طور پر ایک لاکھ 15 ہزار 391 پاکستانی اس سال حج ادا کر رہے ہیں، تاہم پاکستان کو دئیے گئے ایک لاکھ 79 ہزار 210 کے مکمل کوٹے کا صرف 64.39 فیصد ہی استعمال ہو سکا۔

اس طرح 63 ہزار 830 افراد حج سے محروم رہ گئے۔ذرائع کے مطابق عیدالاضحی کے موقع پر10 ذی الحج کو عازمین کو خصوصی دیسی کھانے پیش کیے جائیں گے جن میں ناشتہ میں آملیٹ، حلوہ، خبس/روٹی اور دودھ والی چائے، دوپہر میں چکن بخاری، دال مونگ، روٹی اور سیب جبکہ رات کے کھانے میں آلو مٹن قیمہ، مکس سبزی، متنجن، روٹی، سبز چائے اور دیگر اشیاء شامل ہوں گی۔عازمین کو ہر کھانے کے ساتھ جوس یا لسی، پانی اور پھل بھی فراہم کیے جائیں گے۔ واضح رہے کہ طویل دورانیے کا حج 40 سے 46 دنوں پر مشتمل ہوتا ہے، جبکہ کم دورانیے کا حج 22 سے 25 روز پر محیط ہوتا ہے۔