Live Updates

پاکستان اور ہندوستان کے درمیان موجودہ تنازع 1971کے بعد سب سے بڑا تصادم ہے

دونوں ملکوں میں کشیدگی کافی عرصے تک برقرار رہے گی، انڈیا چاہتا ہے کہ دنیا صرف دہشتگردی پر توجہ دے لیکن دنیا کو سب سے زیادہ فکر نیوکلیئر ہتھیاروں کی ہے۔ سینئر تجزیہ کار برائے جنوبی ایشیاء مائیکل کوگلمین

ثنااللہ ناگرہ پیر 2 جون 2025 21:15

پاکستان اور ہندوستان کے درمیان موجودہ تنازع 1971کے بعد سب سے بڑا تصادم ..

اسلام آباد ( اردوپوائنٹ اخبار تازہ ترین۔ آئی پی اے ۔ 02 جون 2025ء ) امریکا کے ولسن سنٹر میں سینئر تجزیہ کار برائے جنوبی ایشیاء مائیکل کوگلمین نے کہا ہے کہ پاکستان اور ہندوستان کے درمیان موجودہ تنازع 1971کے بعد سب سے بڑا تصادم ہے،دونوں ملکوں میں کشیدگی کافی عرصے تک برقرار رہے گی۔ ہم نیوز کے پروگرام میں گفتگو کرتے ہوئے تجزیہ کار مائیکل کوگلمین نے کہا کہ پاکستان اور ہندوستان کے درمیان موجودہ تنازع 1971کے بعد سب سے بڑا تصادم ہے، ہندوستان کے اقدامات سے دونوں ملکوں کے سفارتی رابطے محدود ہوگئے ہیں، سفارتی تعلقات اور نارمل حالات کی جانب واپسی بہت مشکل دکھائی دیتی ہے۔

پاکستان اور بھارت کے درمیان کشیدگی کافی عرصے تک برقرار رہے گی۔ انڈیا کا خیال ہے کہ اس کو ناقدین کی پروا نہیں لیکن پھر بھی دنیا سے حمایت حاصل کرنے کی کوشش کررہا ہے، انڈیا چاہتا ہے کہ دنیا صرف دہشتگردی پر توجہ دے لیکن دنیا کو سب سے زیادہ فکر نیوکلیئر ہتھیاروں کی ہے۔

(جاری ہے)

اس وقت امریکا اور بھارت کے تعلقات کچھ پیچیدہ ہورہے ہیں، پہلے سمجھا جاتا تھا کہ بھارت اور امریکا کے درمیان تعلقات ہمیشہ مضبوط رہیں گے،حالیہ بحران نے امریکا اور بھارت کے تعلقات میں خدشات پیدا کئے ہیں،انڈیا کے پالیسی ساز سوچنے لگے ہیں کہ امریکا بھارت کا پراعتماد ساتھی نہیں ہے، انڈین پالیسی سازوں کے مطابق امریکا ضرورت کے وقت انڈیا کا پوری طرح ساتھ نہیں دیتا۔

ہندوستان کو مایوسی ہوئی کہ بظاہر امریکا نے اس کی مکمل حمایت نہیں کی۔ انہوں نے کہا کہ پاکستانی وفد واشنگٹن میں حالیہ بحران سے ہٹ کر بھی بات کرے گا تو کامیابی ہوگی۔ پاکستان دنیا کو باور کراسکتا ہے کہ پاکستان اور بھارت کے درمیان تنازع کسی بھی وقت بگڑ سکتا ہے۔انہوں نے کہا کہ ٹرمپ انتظا میہ کرپٹوکے معاملے میں بہت دلچسپی رکھتی ہے، ٹرمپ انتظامیہ پاکستان میں پائی جانے والی معدنیات میں بھی دلچسپی رکھتی ہے، پاکستان اگر امریکا کے دلچسپی والے موضوعات پر بات کرے گا تو بات چیت زیادہ مئوثر ہوسکتی ہے۔