جناح سندھ میڈیکل یونیورسٹی کا 34 واں سنڈیکیٹ اجلاس ،آٹزم سینٹر کے قیام اور اہم پالیسی اصلاحات کی منظوری

پیر 2 جون 2025 22:40

کراچی(اُردو پوائنٹ اخبارتازہ ترین - این این آئی۔ 02 جون2025ء)جناح سندھ میڈیکل یونیورسٹی کا 34 واں سنڈیکیٹ اجلاس پیرکو وائس چانسلر پروفیسر امجد سراج میمن کی زیرِ صدارت منعقد ہوا، جس میں تدریسی، طبی اور انتظامی شعبوں کی بہتری کے لیے کئی اہم فیصلوں کی منظوری دی گئی۔جامعہ نے شمولیتی صحت کی فراہمی کی جانب ایک اہم قدم اٹھاتے ہوئے ایک مخصوص آٹزم سینٹر کے قیام کی منظوری دی، جو نیورولوجیکل اور تخلیقی مسائل میں مبتلا بچوں کے لیے کم لاگت تشخیصی اور علاج معالجے کی سہولیات فراہم کرے گا۔

اجلاس میں یکم فروری 2025 کو ہونے والے 32ویں سنڈیکیٹ اجلاس کی کارروائی کی بھی توثیق کی گئی تاکہ پالیسیوں میں تسلسل برقرار رکھا جا سکے۔ریگولر اور کنٹریکٹ فیکلٹی کے لیے یکساں موسمِ گرما کی تعطیلات کی پالیسی منظور کی گئی تاکہ تعلیمی نظام الاوقات میں ہم آہنگی اور وضاحت پیدا کی جا سکے۔

(جاری ہے)

سنڈیکیٹ نے مالی سال 2025-26 کے بجٹ کی منظوری بھی دی۔لاجسٹک سہولیات کو بہتر بنانے کے لیے ایک نئی سرکاری گاڑی کی خریداری، طلبہ کے لیے ٹرانسپورٹ فیس کے ڈھانچے میں نظرثانی، اور ممتحنین کے معاوضے میں اضافے پر بات چیت گئی، تاکہ موجودہ تقاضوں سے ہم آہنگی پیدا کی جا سکے۔

فیس کے نظام کو شفاف اور مثر بنانے کے لیے اسٹینڈرڈ آپریٹنگ پروسیجرز کی منظوری بھی دی گئی۔وائس چانسلر پروفیسر امجد سراج میمن نے اجلاس کے فیصلوں کو جامعہ کے ترقی پسند وژن کا مظہر قرار دیتے ہوئے کہا، "آٹزم سینٹر کے قیام سے لے کر انتظامی پالیسیوں کی اصلاح تک، ہر قدم JSMU کے ادارہ جاتی ترقی اور طلبہ کی فلاح کے عزم کا عکاس ہے۔"رجسٹرار ڈاکٹر اعظم خان، نے اجلاس کا ایجنڈا پیش کیا، انہوں نے فیصلوں کو اجتماعی کاوش کا نتیجہ قرار دیتے ہوئے ان کے طویل مدتی فوائد پر روشنی ڈالی جو فیکلٹی، طلبہ، اور معاشرے کے لیے سودمند ثابت ہوں گے۔

جناح سندھ میڈیکل یونیورسٹی تعلیم، تحقیق، اور صحت عامہ کے فروغ کے مشن پر کاربند ہے، اور یہ اقدامات پائیدار ترقی اور تعلیمی معیار کی جانب ایک اور اہم پیش رفت کی نمائندگی کرتے ہیں۔