بھارت کی ہٹ دھرمی پر امریکی وزیر خزانہ بھی برہم، تجارتی مذاکرات خطرے میں پڑ گئے

بدھ 13 اگست 2025 21:50

واشنگٹن (اُردو پوائنٹ اخبارتازہ ترین - اے پی پی۔ 13 اگست2025ء) امریکی وزیر خزانہ اسکاٹ بیسنٹ نے بھارت پرکڑی تنقید کرتے ہوئے کہا ہے کہ بھارت امریکا کے ساتھ تجارتی مذاکرات میں مسلسل ہٹ دھرمی کا مظاہرہ کر رہا ہے۔ کشمیرمیڈیاسروس کے مطابق امریکی وزیر خزانہ اسکاٹ بیسنٹ نے ایک انٹرویو میں کہا کہ سوئٹزرلینڈ اور بھارت سمیت کئی ممالک کے ساتھ تجارتی معاہدے ابھی مکمل ہونا باقی ہیں۔

ان کے مطابق، امید ہے کہ ٹرمپ انتظامیہ اکتوبر کے آخر تک مذاکرات کو حتمی شکل دے گی تاہم بھارت کا ہٹ دھر می پر مبنی رویہ مذاکرات میں مسلسل رکاوٹ بن رہا ہے۔انہوں نے کہا کہ امریکی حکام اگلے دو سے تین ماہ میں چینی حکام سے ملاقات کریں گے، جس میں دونوں ممالک کے درمیان معاشی تعلقات کے مستقبل پر بات ہوگی۔

(جاری ہے)

ادھر امریکی محکمہ خارجہ کی ترجمان ٹیمی بروس نے کہا کہ پاکستان اور بھارت کے درمیان حالیہ کشیدگی کے دوران صورتحال بگڑ سکتی تھی، لیکن امریکی قیادت کی بروقت کوششوں سے ممکنہ تباہی کو ٹال دیا گیا۔

انہوں نے کہاکہ دونوں ہمسایہ جوہری طاقتوں کے ساتھ امریکا کے تعلقات مضبوط ہیں اور خطے میں امن قائم رکھنے کے لیے تعاون جاری رہے گا۔ واضح رہے کہ امریکی صدر ڈونلڈ ٹرمپ نے بھارت پر مزید 25فیصد ٹیرف عائد کردیا ہے، جس کے بعد بھارت پر مجموعی امریکی ٹیرف 50فیصد ہو گیا ہے۔