مون سون بارشوں کا ساتواں سپیل زیادہ مضبوط، شدید بارشوں کا امکان

بدھ 13 اگست 2025 19:51

لاہور (اُردو پوائنٹ اخبارتازہ ترین - اے پی پی۔ 13 اگست2025ء) مون سون بارشوں کا ساتواں اسپیل زیادہ مضبوط ہے،13 سے 17 اگست کے دوران پنجاب کے بالائی حصوں میں شدید مون سون بارشوں کا امکان ہے۔ترجمان پی ڈی ایم اے کے مطا بق18 سے21 اگست تک پنجاب کے بیشتر میدانی اضلاع لاہور،منڈی بہائوالدین، گجرات، گوجرانوالہ، مری، گلیات، اٹک، چکوال، جہلم،حافظ آباد، شیخوپورہ، سیالکوٹ، نارووال، ساہیوال، جھنگ، ٹوبہ ٹیک سنگھ، خوشاب، سرگودھا، میانوالی، ننکانہ صاحب، چنیوٹ، فیصل آباد اور اوکاڑہ میں بارش کی پیشگوئی کی گئی ہے۔

اسی طرح21 اگست سے ڈیرہ غازی خان، بھکر، بہاولپور، خانیوال، وہاڑی، لودھراں اور راجن پور میں بارشوں کی پیشگوئی ہے۔ڈی جی پی ڈی ایم اے عرفان علی کاٹھیا نے صوبہ بھر کے کمشنرز و ڈپٹی کمشنرز کو الرٹ رہنے کی ہدایت کردی ہے۔

(جاری ہے)

انہوں نے کہا کہ شدید بارشوں کے باعث لاہور ،راولپنڈی، گوجرانوالہ اور سیالکوٹ میں اربن فلڈنگ جبکہ بڑے دریائوں سے ملحقہ ندی نالوں میں فلیش فلڈنگ کا خطرہ ہے۔

ڈی جی پی ڈی ایم اے نے کہاکہ وزیر اعلی پنجاب کی ہدایات کے پیش نظرسول ڈیفنس،ریسکیو و متعلقہ اداروں کو پیشگی انتظامات مکمل کرنے کا الرٹ جا ری کر دیا گیا ہے۔انہوں نے کہا کہ ایمرجنسی کنٹرول رومز میں سٹاف اورریسکیو 1122 کی ڈیزاسٹر رسپانس ٹیموں کو ہائی الرٹ رکھا جائے۔ڈی جی پی ڈی ایم اے نے کہا کہ عوام جاری کردہ احتیاطی تدابیر پر عمل کریں۔

شدید بارشوں کے باعث مری و گلیات میں لینڈ سلائیڈنگ کا خطرہ ہے،مسافر اور سیاح موسمی صورتحال کے پیش نظر محتاط رہیں اور غیر ضروری سفر سے گریز کریں،اربن و فلیش فلڈنگ کی صورت میں محفوظ مقامات پر رہیں، گاڑی ہرگز بہتے ہوئے پانی سے کراس نہ کریں۔ انہوں نے مزید کہا کہ بارشوں کے باعث کچے مکانات مخدوش عمارتوں کو نقصان کا خدشہ ہے،کسی بھی ایمرجنسی کی صورت میں پی ڈی ایم اے کی ہیلپ لائن1129 پر رابطہ کریں ۔