مقدس مقامات کی صفائی کے لیے امانۃ العاصمۃ المقدسہ کے انتظامات مکمل

بدھ 4 جون 2025 00:40

مکہ مکرمہ (اُردو پوائنٹ اخبارتازہ ترین - اے پی پی۔ 04 جون2025ء) امانۃ العاصمۃ المقدسہ (مکہ میونسپلٹی) نے حج 1446ھ کے موقع پر مشاعر مقدسہ میں صفائی کے تمام انتظامات مکمل کر لیے ہیں۔ بلدیہ کی جانب سے صفائی کے نظام کو جدید خطوط پر استوار کرتے ہوئے، اس سال متعدد جدید سہولیات متعارف کرائی گئی ہیں جن میں برقی کچرا دبانے والے کنٹینرز، زمینی اسٹوریج یونٹس اور جدید مشینری شامل ہے۔

ترجمان امانۃ کے مطابق اس سال حاجیوں کی کثیر تعداد اور محدود جگہ و وقت کے پیش نظر صفائی کے عمل کو مؤثر بنانے کے لیے سائنسی و تکنیکی حل اختیار کیے گئے ہیں۔ ان میں خاص طور پر عارضی کچرا ذخیرہ کرنے کا نظام جدید تقاضوں سے ہم آہنگ بنایا گیا ہے تاکہ حج کے ایام میں پیدا ہونے والے کچرے کی بروقت صفائی ممکن بنائی جا سکے۔

(جاری ہے)

بلدیہ نے 1,235 برقی کچرا دبانے والے جدید کنٹینرز، 113 زمینی ذخیرہ یونٹس، 9 بڑی کچرا گاڑیاں، 4 عبوری اسٹیشنز، اور تقریباً 88,000 مختلف سائز کے کچرا دان مشاعر مقدسہ کے مختلف مقامات پر نصب کیے ہیں۔

صفائی کے اس منصوبے کے لیے 13,500 سے زائد کارکنان کو تعینات کیا گیا ہے جبکہ جدید مشینری جیسے خودکار جھاڑو گاڑیاں، ڈمپرز، لوڈرز، اور چھوٹے سائز کی کثیرالمقاصد گاڑیاں بھی فراہم کی گئی ہیں تاکہ رش والے مقامات پر بھی کام باآسانی کیا جا سکے۔ امانۃ نے اپنی تیاریوں کے حوالے سے کہا کہ تمام مراکز، افرادی قوت، اور مشینری مکمل طور پر تیار ہیں اور حج کے ایام میں زائرین کی سہولت اور صفائی کو یقینی بنانے کے لیے وضع کردہ منصوبوں پر عملدرآمد جاری ہے۔

بلدیہ کا مقصد ضیوف الرحمان کو ایک صاف، محفوظ اور پُرامن ماحول فراہم کرنا ہے تاکہ وہ اپنے مناسک اطمینان سے ادا کر سکیں۔ یہ اقدامات سعودی وژن 2030 کے اہداف — صفائی، ماحولیاتی بہتری، اور شہری سہولیات کی بہتری — کی عملی تصویر ہیں۔