ْ6 بڑی فرٹیلائزز کمپنیوں کو 30 کروڑ روپے ،انڈسٹری ایسوسی ایشن کو ساڑھے 7کروڑ روپے کا جرمانہ

یوریا کے 50 کلو بیگ کی ملک میں یکساں قیمت مقرر کی گئی جو واضح گٹھ جوڑ اور کمپٹیشن ایکٹ کی کی خلاف ورزی ہے

بدھ 4 جون 2025 03:40

لاہور(اُردو پوائنٹ اخبارتازہ ترین - این این آئی۔ 04 جون2025ء)مسابقتی کمیشن آف پاکستان نے کھاد کی من پسند قیمتوں کا تعین کرنے، کسانوں کو ارادی طور پربھاری نقصان پہنچانے پر 6 بڑی فرٹیلائزز کمپنیوں کو 5 کروڑ فی کمپنی کے حساب سے 30 کروڑ روپے جبکہ انڈسٹری ایسوسی ایشن کو ساڑھے 7کروڑ روپے کا جرمانہ عائد کر دیا۔کمپیٹیشن کمیشن کی جانب سے جاری اعلامیے کے مطابق کبیر احمد سدھو اور سلام امین پر مشتمل 2 رکنی بنچ نے کھاد کی قیمتوں پر گٹھ جوڑ کے معاملے کا ازخود نوٹس لیا۔

اعلامیے کے مطابق تحقیقات میں انکشاف ہوا کہ 6 بڑی کمپنیوں اور فرٹیلائزر سیکٹر کی کاروباری تنظیم فرٹیلائزر مینوفیکچررز آف پاکستان ایڈوائزری کونسل اور ممبر کمپنیوں نے ایک آگاہی مہم کے نام پر اشتہار جاری کیا۔

(جاری ہے)

سی سی پی کے مطابق اشتہار میں یوریا کے 50 کلو بیگ کی پورے ملک میں یکساں قیمت مقرر کی گئی جو ایک واضح گٹھ جوڑ اور کمپٹیشن ایکٹ کی دفعہ 4 کی خلاف ورزی ہے، کمیشن کے مطابق قیمت کے اس مشترکہ تعین سے کسانوں کو نقصان پہنچا، خاص طور پر ربیع اور خریف کے اہم موسموں میں کھاد کی قیمتیں مصنوعی طور پر بڑھائی گئیں۔

کیس کی سماعت کے دوران کمپنیوں نے اپنے رویے کا دفاع کرتے ہوئے مقف اختیار کیا کہ قیمتوں کا اعلان حکومت کی ہدایت کی تحت کیا گیا، تاہم کمیشن نے یہ مقف مسترد کرتے ہوئے کہا کہ ایسا کوئی باضابطہ حکم نامہ یا سرکاری مجبوری موجود نہیں تھی جو اس گٹھ جوڑ کو جواز فراہم کرتی۔سی سی پی کے مطابق ان کمپنیوں اور ایسوسی ایشن نے نومبر 2021 میں ایک مشترکہ آگاہی اشتہار کے ذریعے 50 کلو یوریا بیگ کی یکساں قیمت 1768 روپے مقرر کی حالانکہ ہر کمپنی کی لاگت پیداواری صلاحیت اور مارکیٹ شیئر مختلف ہے۔

کمپنیوں کی جانب سے یکساں قیمت مقرر کرنا کمپیٹیشن ایکٹ 2010 کی دفعہ 4 کے تحت واضح طور پر کارٹلائزیشن اور کمپٹیشن قوانین کی خلاف ورزی ہے۔اس سے قبل بھی ایسوسی ایشن اور فرٹیلائزر کمپنیوں کو سال 2010، 2012 اور 2014 میں مسابقتی کمیشن کی جانب سے وارننگ جاری کی گئی تھی تاہم متعلقہ کمپنیاں کوئی بھی خاطرخواہ اور دیر پا تبدیلی دکھانے میں ناکام رہیں۔سی سی پی کے مطابق یکساں قیمتوں کا تعین مارکیٹ میں کھاد کی قیمتوں میں مصنوعی اضافے کا سبب بنی اور کھاد کی یکساں قیمتوں کا تعین کسانوں کے لیے نقصان دہ ثابت ہوا۔ڈاکٹر کبیر سدھو کے مطابق کاروباری و تجارتی تنظیمیں قیمتوں کا تعین نہیں کر سکتیں۔