مصنوعی ذہانت کا بڑھتا استعمال،مائیکروسافٹ نے پھر سینکڑوں ملازمین فارغ کر دیے

بدھ 4 جون 2025 13:18

واشنگٹن (اُردو پوائنٹ اخبارتازہ ترین - اے پی پی۔ 04 جون2025ء) مصنوعی ذہانت کے استعمال میں اضافے کے نتیجے میں امریکی کمپنی مائیکروسافٹ نے مزید سینکڑوں ملازمین کو فارغ کر دیا، صرف گزشتہ ماہ کے دوران 6 ہزار ملازمین کو نکال دیا گیا تھا۔ اکنامک ٹائمز کی رپورٹ کے مطابق یہ برطرفیاں اس بات کی عکاسی کرتی ہیں کہ ٹیکنالوجی کی صنعت کس طرح مصنوعی ذہانت میں اربوں ڈالر کی سرمایہ کاری کرتے ہوئے اپنے مجموعی اخراجات کم کرنے کی کوشش کر رہی ہے ۔

مصنوعی ذہانت کی وجہ سے ملازمین کو فارغ کرنے کا رجحان دیگر بڑی ٹیک کمپنیاں جیسے میٹا اور سیلزفورس بھی اپنا رہی ہیں، یہ کمپنیاں اندرونی طور پر مصنوعی ذہانت کو استعمال کرکے اپنی کارکردگی بہتر اور عملے کی تعداد کم کر رہی ہیں۔

(جاری ہے)

یہ کمپنیاں روایتی شعبوں بالخصوص سافٹ ویئر انجینئرنگ میں ملازمتیں کم اور وسائل کو مصنوعی ذہانت سے متعلق شعبوں کی طرف منتقل کر رہی ہیں۔

واضح رہے کہ جون 2024 تک مائیکروسافٹ کے کل وقتی ملازمین کی تعداد تقریباً دو لاکھ 28 ہزار تھی جن میں سے 55 فیصد ملازمین امریکا میں کام کر رہے تھے، جیسے جیسےمصنوعی ذہانت ترقی کر رہی ہے ٹیک شعبے کی روایتی ملازمتیں خاص طور پر کوڈنگ، کسٹمر سپورٹ اور مواد کی تیاری جیسے کاموں میں ختم ہونے کا خطرہ بڑھ رہا ہے ،تاہم دوسری طرف دوسری طرف اے آئی انجینئرنگ، ڈیٹا سائنس اور مشین لرننگ جیسے شعبوں میں مہارت رکھنے والے افراد کی مانگ تیزی سے بڑھ رہی ہے۔