شرپسند قیدیوں نے سیکیورٹی اہلکاروں سے ہتھیار چھین کر اندھا دھند فائرنگ کی، قیدیوں کے فرار کا واقعہ سنگین سکیورٹی غفلت قرار

جیل سے قیدیوں کے فرار ہونے کے معاملے کی باقاعدہ تحقیقات شروع کر دی گئیں، جیل توڑ کر قیدیوں کے فرار ہونے کا مقدمہ شاہ لطیف ٹاﺅن تھانے میں درج کرلیا گیا

فیصل علوی بدھ 4 جون 2025 16:20

شرپسند قیدیوں نے سیکیورٹی اہلکاروں سے ہتھیار چھین کر اندھا دھند فائرنگ ..

کراچی(اردوپوائنٹ اخبار تازہ ترین۔04 جون 2025)کراچی کی ملیر جیل سے قیدیوں کے فرار ہونے کے معاملے کی باقاعدہ تحقیقات شروع کر دی گئی ہیں، تفتیشی ٹیم نے ملیر جیل سے شواہد اکھٹے کرنے کا عمل شروع کر دیا ہے اور واقعے کی مکمل چھان بین جاری ہے، تفتیشی حکام کا کہنا ہے کہ شرپسند قیدیوں نے جیل کے سکیورٹی اہلکاروں سے ہتھیار چھین کر اندھا دھند فائرنگ کی۔

حکام نے قیدیوں کے فرار کا واقعہ سنگین سیکیورٹی غفلت کا نتیجہ قراردیدیا۔ قیدیوں نے ایس ایم جی ہتھیار سے فائرنگ کی جس کے بعد وہ دیگر قیدیوں کے ہمراہ فرار ہونے میں کامیاب ہو گئے۔تفتیشی حکام کا یہ بھی کہنا ہے کہ ابتدائی تفتیش میں جیل کی سیکیورٹی میں واضح خامیاں سامنے آ رہی ہیں جن کے نتیجے میں ایک بڑے واقعے نے جنم لیا۔

(جاری ہے)

ذرائع کے مطابق ہنگامے اور فائرنگ کے دوران جیل کا کنٹرول وقتی طور پر قیدیوں کے ہاتھ میں آ گیا اور افراتفری کی کیفیت میں 216 قیدی مختلف سمتوں میں فرار ہو گئے۔

تاحال یہ معلوم نہیں ہو سکا کہ کس قیدی نے اسلحہ چھینا اور وہ کس جانب فرار ہوئے۔تفتیشی حکام کے مطابق اب تک 105 قیدیوں کو واپس ملیر جیل پہنچا دیا گیا ہے جن میں سے کئی کو ان کے اہل خانہ نے ازخود جیل واپس لا کر حکام کے حوالے کیا۔ تاہم جیل سیکیورٹی سے چھینی گئی دو ایس ایم جی رائفلز تاحال لاپتہ ہیں۔دوسری جانب کراچی کی ملیر جیل توڑ کر قیدیوں کے فرار ہونے کا مقدمہ درج کرلیا گیا۔

مقدمے میں انسداد دہشت گردی و دیگر دفعات شامل کی گئیں ہیں۔مقدمہ ڈپٹی سپرنٹنڈنٹ ملیر جیل کی مدعیت میں مقدمہ درج کیا گیا ۔مقدمے کے متن میں بتایا گیا ہے کہ رات 12 بج کے پانچ منٹ پر زلزلے کے جھٹکوں کی وجہ سے ملزمان نے چیخنے لگے اس دوران قیدیوں کے ساتھیوں نے اکسایا اور سیل توڑ کر ٹاور کی طرف آئے۔مدعی مقدمے کا کہنا تھا کہ جیل کے قیدیوں کو جب روکنے کی کوشش کی تو انہوں نے مزاحمت کی اور عملے پر تشدد کیا اور ان کا اسلحہ چھین کر فائرنگ کی، فائرنگ کے واقعے میں قیدیوں اور جیل کے اہلکاروں سمیت اٹھ افراد زخمی ہوئے۔

مقدمے میں اسلحہ چھیننے ،بلوے اور حراست سے فرار ہونے کی دفعات بھی لگائی گئی ہیں جبکہ قیدیوں کی ہنگامہ ارائی کے دوران جیل کے اسپتال مین گیٹ اور دیگر املاک کو بھی نقصان پہنچا۔مقدمے کے متن کے مطابق فائرنگ کرنے والوں سمیت 128 قیدی فرار ہوئے ہیں۔88 قیدیوں کو پکڑا جا چکا ہے اور فرار ہونے والے قیدیوں کی تفصیلات بھی مرتب کر لی گئی ہیں۔