Live Updates

عید سے قبل مہنگائی کی پھر سے اونچی اڑان

عید الاضحٰی سے قبل رواں ہفتے کے دوران ٹماٹر، آلو اور پیاز کی قیمتوں میں 17 فیصد تک اضافہ ہو گیا

محمد علی جمعرات 5 جون 2025 21:04

لاہور (اردو پوائنٹ تازہ ترین اخبار ۔ 05 جون 2025ء ) عید سے قبل مہنگائی کی پھر سے اونچی اڑان، عید الاضحٰی سے قبل رواں ہفتے کے دوران ٹماٹر، آلو اور پیاز کی قیمتوں میں 17 فیصد تک اضافہ ہو گیا۔ تفصیلات کے مطابق عید الاضحٰی سے قبل ملک میں مہنگائی کا جن پھر سے قابو ہو گیا ہے۔ عید الاضحٰی قریب آتے ہی سبزیوں سمیت متعدد اشیاء مزید مہنگی ہو گئی ہیں۔ عید الاضحٰی سے قبل آخری ہفتے کے دوران ہونے والی مہنگائی سے متعلق رپورٹ جاری کی گئی ہے۔

ادارہ شماریات کی جانب سے جاری کردہ رپورٹ میں انکشاف ہوا ہے کہ رواں ہفتے کے دوران سبزیوں کی قیمتوں میں 17 فیصد تک اضافہ ہو گیا۔ ادارہ شماریات کی ہفتہ وار رپورٹ کے مطابق ایک ہفتے کے دوران ٹماٹر 16.94 فیصد، آلو 11.52 فیصد، پیاز 5.21 فیصد، کیلے1.57 فیصد اورانڈوں کی قیمت میں 1.34 فیصد کا اضافہ ہوا۔

(جاری ہے)

رپورٹ کے مطابق ایک ہفتے میں چینی کی قیمت میں 1.24 فیصد اور ٹوٹا چاول کی قیمتوں میں 1.02 فیصد اضافہ دیکھنے میں آیا، اس کے علاوہ پیٹرول، تازہ دودھ، آٹا، دالیں اور گُڑ کی قیمتوں میں بھی اضافہ ہوا۔

ادارہ شماریات کی رپورٹ کے مطابق ایک ہفتے میں چکن کی قیمت میں 11.22 فیصد اور لہسن کی قیمت میں 3.71 فیصد کمی واقع ہوئی۔ رپورٹ میں مزید کہا گیا ہے کہ گھی، کوکنگ آئل اور ایل پی جی کی قیمتوں میں بھی کمی ہوئی، ایک ہفتے کے دوران 18 اشیائےضروریہ مہنگی اور 6 کی قیمتوں میں کمی دیکھنے میں آئی۔ ادارہ شماریات کی رپورٹ کے مطابق حالیہ ہفتے27 اشیاء کی قیمتوں میں استحکام رہا جبکہ ہفتہ واربنیادوں پر مہنگائی کی شرح میں 0.02 فیصدکا اضافہ رپورٹ ہوا۔