Live Updates

بھارت کا بیانیہ ہے کہ دنیا ہمیں اجازت دے جب چاہیں کسی پر بھی حملہ کرسکیں

اب مغرب بھی ڈر رہا کہ بھارت توخود اپنی حفاظت بھی نہیں کرسکا، ہمیں کوئی بیانیہ نہیں بیچنا بس دنیا کے سامنے حقیقت بیان کرنی ہے۔سابق وزیر خارجہ حنا ربانی کھر

ثنااللہ ناگرہ جمعرات 5 جون 2025 23:10

بھارت کا بیانیہ ہے کہ دنیا ہمیں اجازت دے جب چاہیں کسی پر بھی حملہ کرسکیں

اسلام آباد ( اردوپوائنٹ اخبار تازہ ترین۔ آئی پی اے ۔ 05 جون 2025ء ) پاکستان کے سفارتی مشن کی رکن ، سابق وزیر خارجہ حنا ربانی کھر نے کہا ہے کہ بھارت کا بیانیہ ہے کہ دنیا ہمیں اجازت دے جب چاہیں کسی پر بھی حملہ کرسکیں،اب مغرب بھی ڈر رہا کہ بھارت توخود اپنی حفاظت بھی نہیں کرسکا، ہمیں کوئی بیانیہ نہیں بیچنا بس دنیا کے سامنے حقیقت بیان کرنی ہے۔

رکن سفارتی مشن حنا ربانی کھر نے اے آروائی نیوز سے گفتگو میں کہا کہ آج سے زیادہ کبھی خود پر اتنا زیادہ فخر محسوس نہیں ہوا۔ جب کچھ ٹھیک کام کرتے ہیں تو دنیا آپ کے پیچھے کھڑی ہوجاتی ہے، بھارتی وفد نے اقوام متحدہ کی عمارت میں قدم بھی نہیں رکھا، ان سب کا بائیکاٹ کردیا۔ جب کہ ہم نے سیکرٹری جنرل سے لے کر ہرشخص کے پاس گئے اور ملاقات کی۔

(جاری ہے)

ہمیں کوئی بیانیہ نہیں بیچنا ہمیں بس حقیقت بیان کرنی ہے۔

ہم نے یہاں سب کو بتایا کہ خطے میں دو ایٹمی طاقتوں میں ایک ایٹمی طاقت انڈیانے اپنا بت گرادیا،مغرب بھی ڈر رہا ہے کہ جس کو ہم نے سکیورٹی کیلئے رکھا وہ بھارت تو اپنی حفاظت بھی نہیں کرسکا۔بھارت دنیا سے کہہ رہا ہے کہ ہمیں اجازت دی جائے جب چاہیں کسی پر بھی حملہ کرسکیں، اقوام متحدہ کی قراردادیں بھاڑ میں جائیں۔مزید برآں پاکستان کے سفارتی مشن کے سربراہ ، چیئرمین پیپلزپارٹی بلاول بھٹو زرداری نے بلوم برگ کو انٹرویو میں کہا کہ بھارت نے متنازع ایٹمی صلاحیت والے سپر سونک میزائل استعمال کئے،فیصلہ کرنے کیلئے صرف 30 سیکنڈ ہوتے ہیں کہ میزائل ایٹمی ہے یا نہیں۔

دونوں ممالک مستقبل میں تیزی سے کشیدگی کی سیڑھی چڑھ سکتے ہیں، کشیدگی بڑھی تو پھر عالمی قیادت کے پاس مداخلت کا بھی وقت نہیں بچے گا، ایٹمی میزائلوں کا استعمال مستقبل میں ٹکراؤ کیلئے نیا خطرہ ہے۔ 30سکینڈ میں فیصلہ کرنا پڑتا ہے کہ میزائل جوہری ہتھیار سے لیس ہے یا نہیں؟پاکستان کو بھی 30 سیکنڈ میں فیصلہ کرنا پڑے گا کہ ردعمل کیسا ہونا چاہئے۔ کشیدگی اتنی تیز ہوگی کہ عالمی رہنماؤں کو مداخلت کا موقع ہی نہیں ملے گا، صدر ٹرمپ اور دیگر عالمی رہنماؤں کو بھی مداخلت کا موقع نہیں ملے گا۔ اسی طرح نے امریکی ٹی وی کو انٹرویو دیتے ہوئے بلاول بھٹو نے کہا کہ حالیہ بھارتی جارحیت کی وجہ سے مستقبل کے تنازعات میں جوہری خطرات میں اضافہ ہوا ہے۔