یونیورسٹی آف سرگودھا میں عالمی ماحولیاتی دن کے حوالے سے خصوصی تقریبات، سیمینارز اور پروگرامزکا انعقاد

سرگودھا (اُردو پوائنٹ اخبارتازہ ترین - اے پی پی۔ 05 جون2025ء) وزیر اعلیٰ پنجاب مریم نواز شریف کے وژن کے مطابق یونیورسٹی آف سرگودھا میں عالمی ماحولیاتی دن کے حوالے سے خصوصی تقریبات، سیمینارز اور پروگرامز کا انعقاد کیا گیا۔ ان تقریبات کے ذریعے وائس چانسلر یونیورسٹی آف سرگودھا پروفیسر ڈاکٹر قیصر عباس، طالب علموں، اساتذہ اور افسران نے عالمی ماحولیاتی دن کے حوالے سے عوام الناس میں شعور اجاگر کیا نیز طلباوطالبات نے وطن عزیز اور اپنے ادارے کو آلودگی سے پاک اور ماحول کو صاف ستھرا رکھنے کے لئے خصوصی عزم کا بھی اظہار کیا۔

اس سلسلے میں یونیورسٹی آف سرگودھا کے ملک فیروز خان نون بزنس سکول میں ایک خصوصی تقریب منعقد ہوئی جس میں کالج آف ایگری کلچر کے شعبہ سوئل سائنسز کے چیئرمین پروفیسر ڈاکٹر محمد اشرف، شعبہ جنگلات کے چیئرمین ڈاکٹر عرفان اشرف، شعبہ ارضیات کے ڈاکٹر ہارون علی شاہ اور شعبہ پنجابی کے الیاس گوندل نے خطاب کیا۔

(جاری ہے)

سیمینار سے خطاب کرتے ہوئے پروفیسر ڈاکٹر محمد اشرف نے کہا کہ ماحولیاتی آلودگی صرف ایک ملک، ادارے اور کسی ایک فرد کا مسئلہ نہیں بلکہ یہ ایک عالمگیر مسئلہ ہے جس کے حل کے لئے ہر فرد کو اپنے طور پر عملی فرائض سرانجام دینا ہوں گے۔

انہوں نے کہا کہ جدید دور میں تیزی سے بدلتی ہوئی دنیا میں جہاں انسان نے بہت ترقی کرلی ہے وہاں ماحول پر بہت کم توجہ دی ہے۔ انہوں نےکہا کہ فیکٹریوں سےنکلنے والے زہریلے مادے اور خطرناک گیسز سے ہماری مٹی میں مدافعت کم ہوتی جارہی ہے جس کے باعث کینسر اور دیگر خطرناک بیماریاں تیزی سے جنم لے رہی ہیں۔ پروفیسر ڈاکٹر محمد اشرف نے کہا کہ وزیر اعلیٰ پنجاب کا ستھرا پنجاب پروگرام ماحول کو صاف کرنے کی ایک اہم ترین کڑی ہے جس کے دور رس نتائج سامنے آرہے ہیں اور وہ دن دور نہیں جب ہمارا پورا وطن عزیز صاف ستھرا اور ماحول دوست کہلائے گا۔

تقریب سے خطاب کرتے ہوئے ڈاکٹر عرفان اشرف نے کہا کہ عالمی ماحولیاتی دن منانے کا مقصد صرف باتوں اور پروگرامز کی حد تک نہیں ہونا چاہیئے بلکہ یہ ہمیں عمل کی دعوت دیتا ہے کہ ہم اپنے ماحول میں جتنا ہوسکے درخت لگائیں اور ہر فرد کو اپنی زندگی میں کم از کم دو سے تین درخت ضرور لگانے چاہئیں۔ انہوں نے بتایا کہ اس سال ہم نے جنگلات کے عالمی دن کے موقع پر کالج آف ایگری کلچر میں طالب علموں کی مدد سے صرف دو منٹ میں ایک ہزار سے زیادہ پودے لگا کر ریکارڈ قائم کیا۔

سیمینار سے خطاب کرتے ہوئے شعبہ ارضیات کے ڈاکٹر ہارون علی شاہ نے کہا کہ اس وقت پوری دنیا میں ماحولیاتی تبدیلی سے گلیشیئر تیزی سے پگھلتے جارے ہیں جو ایک بہت بڑا لمحہ فکریہ ہے۔ انہوں نے کہا کہ پاکستان کے قرب و جوار میں بہت سے گلشیئرز موجود ہیں جو تیزی سے پگھلتے جارہے ہیں اگر ہم اپنے ماحول کو صاف ستھرا رکھنا چاہتے ہیں اور اس عالمی دن کو اچھے طریقے سے منانا چاہتے ہیں تو ہمیں زیادہ سے زیادہ شجرکاری کرنا ہوگی۔

تقریب سے شعبہ پنجابی کے استاد الیاس گوندل نے خطاب کرتے ہوئے کہا کہ پنجاب ہماری شان ہے اور ہمیں وزیر اعلیٰ پنجاب کے وژن کے مطابق اسے صاف ستھرا بنانے کے لئے عملی اقدامات کرنا ہوں گے۔ جنگلات کےعالمی دن کی مناسبت سے یونیورسٹی ریڈیوپرخصوصی ٹاک شو کا انعقاد کیا گیا جس کی میزبانی اسسٹنٹ ڈائریکٹر ریاض شاد ہم نصابی فورم دائم اقبال نے کی۔ پروگرام میں جنگلات میں اضافہ کی ضرورت اور اُن کی افادیت پر گفتگو کرتے ہوئے اس بات پر زور دیا گیا کہ جنگلات میں اضافہ کے لیے کمیونٹی سطح پر شعور اجاگر کیا جائے جبکہ شجر دوستی کےرویوں کو پروان چڑھایا جائے۔