Live Updates

بلاول بھٹو زرداری نے سی پیک کی طرح پاک بھارت اقتصادی راہداری کی تجویز دے دی

پاکستان، بھارت اور بنگلادیش تک اقتصادی راہداری بن سکتی ہے، دونوں ممالک میں تجارتی سرگرمیوں کے فروغ سے ترقی اور عوام خوشحال ہوں گے۔سفارتی مشن کے سربراہ بلاول بھٹو کا خطاب

ثنااللہ ناگرہ جمعہ 6 جون 2025 19:53

بلاول بھٹو زرداری نے سی پیک کی طرح پاک بھارت اقتصادی راہداری کی تجویز ..

اسلام آباد ( اردوپوائنٹ اخبار تازہ ترین۔ آئی پی اے ۔ 06 جون 2025ء ) پاکستان کے سفارتی مشن کے سربراہ ،چیئرمین پیپلزپارٹی بلاول بھٹو زرداری نے پاک بھارت اقتصادی راہداری کی تجویز دے دی ہے۔ واشنگٹن میں بلاول بھٹو نے مڈل ایسٹ انسٹیٹیوٹ میں خطاب کرتے ہوئے کہا کہ سی پیک کی طرح پاک بھارت اقتصادی راہداری بھی بننی چاہئے، پاکستان، بھارت اور بنگلادیش تک اقتصادی راہداری بن سکتی ہے، دونوں ممالک میں تجارتی سرگرمیوں کے فروغ سے عوام خوشحال ہوں گے۔

انہوں نے کہا کہ دونوں ممالک کے درمیان حکومتوں کی سطح پر کوئی رابطہ ہے ، نہ فنکاروں کی سطح پر رابطہ ہے اور نہ ہی تجارت ہورہی ہے۔کتنا زبردست ہو کہ اگر پاکستان سے چٹاگانگ بنگلادیش بندرگاہ تک پاکستان اور انڈیا کے درمیان راہداری بنے۔

(جاری ہے)

مزید برآں پاکستان کے سفارتی مشن کے سربراہ اور چیئرمین پاکستان پیپلز پارٹی، بلاول بھٹو زرداری نے امریکی کانگریس کی خارجہ امور کمیٹی کے چیئرمین برائن ماسٹ، رینکنگ ممبر گریگوری میکس، جنوبی و وسطی ایشیا سے متعلق ذیلی کمیٹی کے چیئرمین بل ہائزنگا، اور سینئر کانگریس مین بریڈ شرمین سے ملاقات کی۔

یہ ملاقات جنوبی ایشیا میں امن و استحکام سے متعلق کھلے اور تعمیری تبادلہ خیال پر مبنی تھی۔چیئرمین بلاول بھٹو زرداری نے بھارتی حکومت کی حالیہ اشتعال انگیزیوں پر پاکستان کے گہرے تحفظات کا اظہار کیا، بالخصوص سندھ طاس معاہدے کو یکطرفہ طور پر معطل کرنا ایک خطرناک نظیر اور بین الاقوامی قوانین کی سنگین خلاف ورزی ہے۔انہوں نے مقبوضہ جموں و کشمیر میں بگڑتی ہوئی انسانی حقوق کی صورتحال پر بھی روشنی ڈالی اور کہا کہ دیرپا امن زبردستی یا دباؤ سے نہیں بلکہ صرف بامعنی مکالمے اور سفارتکاری سے حاصل کیا جا سکتا ہے۔

چیئرمین بلاول بھٹو زرداری نے امریکا کی جانب سے خطے میں کشیدگی کم کرنے کی کوششوں کو سراہا اور پاکستان کے علاقائی امن اور مسئلہ کشمیر کے منصفانہ حل کے عزم کا اعادہ کیا۔