Live Updates

نواب شاہ ، زائد کرایہ وصول کرنے والی ٹرانسپورٹ گاڑیوں کے خلاف کارروائی، 30 ہزار روپے مسافروں کو واپس

جمعہ 6 جون 2025 21:40

حیدرآباد (اُردو پوائنٹ اخبارتازہ ترین - اے پی پی۔ 06 جون2025ء) سینئر صوبائی وزیر ٹرانسپورٹ شرجیل انعام میمن اور ڈپٹی کمشنر شہید بینظیر آباد عبدالصمد نظامانی کی خصوصی ہدایات پر عیدالاضحیٰ کے موقع پر عوام کو ریلیف فراہم کرنے کے لیے پبلک ٹرانسپورٹ میں زائد کرایہ وصولی کے خلاف بھرپور کارروائی کی گئی۔ سیکرٹری ڈسٹرکٹ ریجنل ٹرانسپورٹ اتھارٹی ہارون جمالی نے موٹروے پولیس کے تعاون سے مختلف روٹس پر چلنے والی 120 پبلک ٹرانسپورٹ گاڑیوں کی چیکنگ کی۔

دورانِ چیکنگ انکشاف ہوا کہ بعض گاڑیاں مسافروں سے مقررہ کرایہ سے زائد رقم وصول کر رہی تھیں۔ زائد کرایہ وصول کرنے والی گاڑیوں پر مجموعی طور پر 20 ہزار روپے جرمانہ عائد کیا گیا جبکہ مسافروں سے لیا گیا 30 ہزار روپے زائد کرایہ موقع پر ہی واپس کروایا گیا۔

(جاری ہے)

سیکرٹری ہارون جمالی نے کہا کہ عیدالاضحیٰ کے موقع پر مسافروں کو ریلیف فراہم کرنے کے لیے ٹرانسپورٹ سیکٹر میں نگرانی اور کارروائیاں جاری رہیں گی۔

ان کا کہنا تھا کہ عوام سے مقررہ کرایہ سے زائد رقم وصول کرنے والے عناصر کے خلاف سخت ایکشن لیا جائے گا۔ اس موقع پر مختلف مسافروں نے حکومتی اقدامات کو سراہتے ہوئے صوبائی وزیر ٹرانسپورٹ، ڈپٹی کمشنر اور ٹرانسپورٹ اتھارٹی کے ذمہ داران کا شکریہ ادا کیا کہ انہوں نے عید جیسے اہم موقع پر عوامی مسائل کو ترجیح دی۔